Les Xornaes Lliteraries del Arcu Atlánticu van facer un homenaxe a la lliteratura irlandesa en gaélicu

|
Éire ye’l país convidáu del Festival Arcu Atlánticu, polo que les Xornaes Lliteraries qu’entama L’Arribada dientro’l certame van centrase nes lletres d’esti país de raigaños celtes. Ente les actividaes destaca un homenaxe a la lliteratura en gaélicu.
 
L’Asociación Cultural L’Arribada ta acabante de dar un avance del programa que tiene previstu pa la tercer edición del Festival Arcu Atlánticu, que va tener llugar del 25 de xunetu al 3 d’agostu. En total, les Xornaes Lliteraries del Arcu Atlánticu van constar de 32 actos repartíos ente’l domingu 27 y el sábadu 2, y dividíos en trés espacios, la Carpa Espaciu Pallabres d’El Muelle –onde tamién va tar instalada la llibrería–, el patiu del Centru de Cultura Antiguu Institutu y el Muséu Casa Nata de Xovellanos. Precisamente esti últimu espaciu va acoyer la Xeremandía’l sábadu 2 d’agostu, a les 12.30 hores, na que van recitase poemes en gaélicu, traducíos tamién al asturianu y al castellanu, treslladando asina a los asistentes una sonoridá nuevo pa unos testos creaos ente los sieglos V al XIX.
 
Otres actividaes destacaes van ser les que protagonice l’actor, direutor d'escena y ensayista dublinés Denis Rafter, el xueves 31. Pela mañana, de 10 a 13 hores, va impartir una clase maxistral nel Antiguu Institutu, na que pa participar ye necesario insciribise –de baldre– na direición de corréu electrónicu promociondelasartes@gijon.es. Mentes, a les 20.30 hores, va acudir a Espaciu Pallabres pa compartir colos presentes la so esperiencia sobre l’oficiu, creatividá y formación del actor, y, darréu, participar nun alderique de nome ‘De Samuel Beckett al teatru n'Asturies’ en compaña d’otros profesionales de les artes escéniques, nesti casu los asturianos Andrés Presumido, Boni Ortiz y José Antonio Lobato.
 
Nes Xornaes Lliteraries del Arcu Atlánticu tamíen va falase de les obres d’autores irlandeses que tán traducíes a la nuesa llingua. Asina, analizaránse dellos títulos d’escritores como Oscar Wilde, Maria Edgeworth, James Joyce, John Millington Synge, Seamus Heane o Jonathan Swift, y per aciu d'un audiullibru fadráse alcordanza del más famosu de los personaxes creáu por Bram Stoker. Complétense les actividaes con curtiumetraxes, documentales y películes, actuaciones musicales, recitales, representaciones teatrales, conferencies y presentaciones. Ente éstes últimes destaca la del llibru ‘La fuga del náufrago’, de Miquel Silvestre, autor  que dio la vuelta al mundu y percorrió más de noventa países na so ‘Ruta de los Exploradores Olvidados’, que tien el so orixe n’Éire, onde descubrió'l rastru de Francisco de Cuéllar, sobreviviente de l'Armada Invencible.
 
Más conceyos convidaos
 
Esta selmana tamién diose a concer un avance de tola programación del Festival Arcu Atlánticu, qu’esti añu convida a un mayor númberu de conceyos, cola presencia de Cangues d’Onís, Cabrales, Nava, Siero, Carreño, Villaviciosa y Ribeseya. Amás, Corcaigh va ser la ciudá irlandesa invitada, siguiendo los pasos de Lisboa y Naunnt. La gran novedá con respeuto a años anteriores ye’l cambiu d’emplazamientu de la Gala Inaugural (vienres 25, 20 hores), que pasa del Teatru Xovellanos a la Plaza Mayor.
 
 
Contador Estadistiques