Les Xornaes Internacionales d'Estudiu de l'ALLA algamen la so trentena quinta edición

Celébrense ente'l martes y el xueves baxo'l nome de 'Faciendo llingua cola lliteratura'.

El meudía de mañana, nel salón d'actos de la Facultá de Filosofía y Lletres de la Universidá d'Uviéu, tendrá llugar la inauguración de les XXXV Xornaes Internacionales d'Estudiu qu'entama l'Academia de la Llingua Asturiana (ALLA) cola intervención del vicerrector d'Estensión Universitaria y Proyeición Internacional de la Universidá d'Uviéu, José Borge; el decanu de la Facultá de Filosofía y Lletres, José Antonio Gómez Rodríguez; y la presidenta de la institución académica, Ana María Cano. La sesión entamará coles presentaciones de la edición dixital del númberu 115 de la revista 'Lletres Asturianes' y del númberu 6 de la revista dixital 'Ciencies. Cartafueyos Asturianos de Ciencia y Teunoloxía', siendo l'encargáu de dar la conferencia inaugural el profesor universitariu Aurelio González Ovies, que va tratar sobre ''Aquella caxa llonxana', un tópicu al que s'acerca la mayoría los poetes'.

Darreú, numberosos profesores y investigadores asturianos xunto con otros de distintes universidaes de fuera del país, van protagonizar ponencies y comunicaciones. Nesta ocasión resultaron convidaos Ramón Mariño (Universidade de Santiago de Compostela), Javier Rivero (Universidad Complutense de Madrid), Ramiro González Delgado (Universidá d'Estremadura), Javier Rubiera (Université de Montréal), Antonio Gómez Bautista (Fundação Calouste Gulbenkian) y Rosa Agost (Universitat Jaume I).

Nel documentu axuntu pue contemplar el programa completu de les XXX Xornaes Internacionales d'Estudiu.