Les Xornaes d'estudiu de la gaita, resumíes nun llibru

El Muséu del Pueblu d'Asturies presentó esta selmana la edición d'un llibru que recueye les ponencies de les Xornaes d'Estudiu de la gaita. Estes xornaes desenvolviéronse a últimos de mayu del 2005, y nelles xuntáronse bien de conocedores del mundu de la gaita pa tratar sobre dellos temes, dalgunos polémicos enforma.

El llibru que sal nuna edición non venal, y va repartise en Institutciones escueles de música, amás de tar disponible nel propiu muséu. El llibru recueyes les doce ponencies de les xornaes nes que faló xente como Pedro Pangua sobre L'oficiu del gaiteru, Alfonso Fernández García -Director del Muséu de la Gaita- sobre l'Orixe y evolución de la gaita asturiana, David González sobre A gaita d'Occidente, Daniel García de la Cuesta sobre Etimoloxíes de les gaites, el gaiteru y inxenieru Pelayo Fernández que charró de La Payuela Asturiana. Comparativa con otres llingüetes o Flavio Rodríguez sobre Les enseñances de la gaita asturiana: presente y futuru, la esperiencia de de la Escuela Municipal de Nava.

Ún de los temes estrelles de les xornaes, y llevantó bastante polémica nes mesmes foi la cuestión la gaita asturiana nel occidente asturianu y la so convivencia cola gaita gallega. Sobre esta cuestión ficieron dos ponencies, que tamién tán nel llibru, el constructor de gaites Carlos Moreno qu'espuso'l so estudiu Gaita gallega, gaita asturiana y zones transición, y Xosé Miguel Suárez -Tapia- que presentó parte del material d'un estudiu llamáu Gaitas y gaiteiros nel estremo occidental d'Asturias, que d'equí a poco tamién va espublizar el Muséu del Pueblu d'Asturies de manera completa.