Les xornaes de lliteratura infantil y xuvenil de Samartín van celebrase per primer vez n’asturianu

El Conceyu de Samartín del Rei Aurelio anunció que les xornaes de lliteratura infantil y xuvenil van celebrase per primer vez en llingua asturiana. Éstes, que van principiar el día 22, cumplen esti añu’l so décimu aniversariu.
 
La Casona del Bravial, en Blimea, va ser la sede de toles actividaes de les X Xornaes de Lliteratura Infantil y Xuvenil. En total, van ser trés los eventos previstos con aniciu, en tolos casos, a les 19 hores. El primeru d’ellos va tener llugar el martes día 22 y va consistir na presentación del llibru ‘A pespunte’, de Montserrat Garnacho, obra editada por Trabe ganadora del premiu Xosefa Canellada 2010 de Lliteratura Infantil y Xuvenil concedíu pola Conseyería de Cultura.
 
Pal día siguiente, miércoles, el profesor Jesús Rodríguez Martínez va dar a conocer el so proyeutu ‘Ciencia y filosofía n’asturianu’, publicación en llingua asturiana destinada al alumnáu de primaria y secundaria col que se pretende que los neños y neñes vayan familiarizándose con dellos conceutos científicos y corrientes del pensamientu. Por último, el martes 29, l’escritor Chechu García va ufrir una charra sobre ‘La historia del cómic asturianu’.
 
Otra manera, dientro del marcu d’estes xornaes, ta celebrándose una esposición sobra la obra del ilustrador Sidoro Villa Costales. Nella, los visitantes van poder ver una esbilla de dibuxos orixinales d’esti autor sierense. Esta muestra va tar abierta al públicu hasta’l 9 d’avientu n’horariu de 10 a 14 hores y de 17 a 20 hores, de llunes a vienres. Toes estes actividaes, a les qu’hai que sumar delles en castellanu con sede en L’Entregu y Sotrondiu, taen entamaes pola Conceyalía de Cultura al traviés de la Oficina de Normalización Llingüística.
 
Cine n’asturianu
 
Les películes ‘El tercer home’, ‘Los viaxe de Gulliver’, ‘Popeye y les mil y una nueches’ y '‘McLintock’, doblaes al asturianu por Gonzali Producciones, van proyeutase en Samartín del Rei Aurelio nesti mes. La primer d’elles va poder vese na Casa del Bravial el martes día 15, mentes que la segunda va protagonizar l’actividá de la Casa la Cultura de L’Entregu’l xueves 17.
 
La fecha prevista pa la proyeición de ‘Popeye y les mil y una nueches’ ye’l xueves 24 na Aula Cultura La Plaza de Sotrondio, mentes que’l western ‘McLintock’ va zarrar el cilcu na Casona Bravial el xueves 1 d’avientu. Toles sesiones van principiar a les 19 hores.