Les XLI Xornaes Internacionales d’Estudiu axunten n’Uviéu a espertos de siete universidaes

L’Edificiu Alministrativu de la Facultá de Filosofía y Lletres de la Universidá d’Uviéu acueye trés díes de conferencies, comunicaciones y presentaciones al rodiu los estudios filolóxicos asturianos, la lliteratura, la toponimia, la fonética o la pragmática. L’Academia de la Llingua Asturiana (ALLA) celebra les XLI Xornaes Internacionales d’Estudiu con presencia d’espertos de seis universidaes de fuera del país y de l’asturiana.

Al meudía va tener la inauguración oficial, na que’l presidente Xosé Antón González Riaño va tar acompañáu del vicerrector de Xestión Académica de la Universidá d’Uviéu, José Miguel Arias, y el decanu de la Facultá de Filosofía y Lletres, Francisco Martín Miguel. Darréu van presentase los númberos 129 de ‘Lletres Asturianes’ y 13 de ‘Ciencies. Cartafueyos Asturianos de Ciencia y Teunoloxía’, y Franz Rainer, de la Wirtschafts Universität Wien, va poner la primer conferencia de les ochos programaes a les 13 hores, entitulada ‘El desarrollo de los sufijos latinos -ĬCIUS e -ĪCIUS en las lenguas románicas’.

La xornada va siguir pela tarde, dende les 16 hores, cola intervención ‘Los premios literarios como agente normalizador de la novela criminal en las literaturas minorizadas’, a cargu de Javier Rivero, de la Universidad de la Laguna. Llueu van poner comunicaciones Iris Díaz Trancho, sobre la ‘Tresmisión interxeneracional del asturianu: estudiu de casu nel conceyu de Piloña’; Andrés Fernández Menéndez, al rodiu ‘Lo maraviyoso y lo sobrenatural: sobro la fantasía asturiana contemporánea’; Lucas Vega, de ‘La lliteratura en ‘fala’ en el primer tercio del siglo XX: un análisis comparativo de dos periódicos’; y Sergio Buelga, que presenta una ‘Propuesta categorial pa la determinación teatrolóxica del corpus d’obres del teatru popular asturianu’.

Va finar el día, depués d’una posa, la presentación a les 18.20 hores de ‘Equí siguimos: audiovisual de ‘La mio vida ye una novela’’, con Paquita Suárez-Coalla y la conferencia ‘El llugar de la lliteratura n’asturianu: una cuestión d’ética y lliteratura’, a cargu de Raquel Fernández-Menéndez, de la Universidad de Alcalá. L’accesu a toles actividaes de les Xornaes Internacionales d’Estudiu ye llibre hasta completar aforu, con preferencia pa los matriculaos.

Mañana y el xueves, namás pela tarde

Na segunda xornada Wendy Elvira-García, de la Universitat de Barcelona, va falar a les 16 hores de la ‘Comparacion acústica de los sistemas vocálicos del asturiano y el español de Asturias en hablantes bilingües’, y Toribio Fuente, de la Universidá d’Uviéu, darréu de ‘La hidrotoponimia leonesa: los nombres de los ríos, arroyos y otros cursos de agua’. A les 18.20 hores, depués d’una posa, van presentase les novedaes editoriales de la Secretaría Llingüística del Navia-Eo de l’ALLA, pa finar el día cola conferencia ‘Encuentro de lenguas en la toponimia menor del siglo XVI en los confines de Senabria’, de Pascual Riesco, de la Universida de Sevilla.

L’últimu día, tamién a les 16 hores, Avelino Corral, de la Universidad Autónoma de Madrid, va abrir l’actividá cola ponencia ‘Estudiu comparativu del suxuntivu n’asturianu y castellán’. Nesta xornada va haber cuatro comunicaciones: ‘Análisis de la xurisprudencia sobra la llingua asturiana’, de Nicolás Bartolomé; ‘De ‘por embargu’ a ‘sin embargu’, origen lingüístico de dos marcadores discursivos en asturiano y castellano’, d’Emilio Fernández Viejo; ‘‘Mando que yo den’: una contribución al estudiu de los pronomes personales del asturianu medieval’, de Clara Elena Prieto; y ‘Plurillingüismu nel ‘Vocabulario de las palabras y frases bables...’’, de Darío de Dios.

Va poner el ramu a les XLI Xornaes Internacionales d’Estudiu a les 18.20 hores, llueu d’una posa, Pedro Riesco, de la Universidá d’Uviéu, cola conferencia ‘El reló, la campana y el tirotéu. Notes semántiques, pragmátiques y sociollingüístiques sobre’l verbu ‘sentir’’. El pieslle oficial va facese a les 19.20 hores.

Na imaxe, los trés conferenciantes de la primer xornada: Rainer, Rivero y Fernández Menéndez.