Les webs de los conceyos asturianos nun dan la midida

Años depués de l'apaición de la internet, namás 52 de los 78 conceyos asturianos (el 67% del total) tienen páxina web propia, según un estudiu sobre aplicación de les nueves tecnoloxíes nos conceyos encargáu pola Federación Asturiana de Conceyos que presentó ayeri en rueda de prensa'l presidente de la FACC y alcalde de L.lena Hugo Morán. L'informe esclaria la idega que los conceyos tienen de lo que tien de ser la so presencia na web, que ven más como un elementu de promoción turística qu'un serviciu al ciudadanu. Asina, el 86% de les webs apúrren-y información al turista, pero namás el 38 per cientu tienen daque d'información o servicios que-y valgan al ciudadanu. Ente les primeres, rescamplen casos como'l del Ayuntamientu de Miranda que ye turística dafechu

L'actualización de conteníos ye otra de les asignatures pendientes de los ayuntamientos del país, y ye que namás el 40% de los conceyos actualizaron les sos páxines web esti mes últimu. Ente les que non

En cuantes a l'accesibilidá de les mesmes, ye difícil dacuando hasta saca-yos el nome, porque anque les más d'elles mándense del esquema tradicional "www.ayto-nome del conceyu.es" hai bien delles que tan allugaes en servidores particulares d'empreses, colo cual de mano nun se sabe si ye la web oficial o una páxina d'un particular (el casu del Ayuntamientu de Samartín del Rei Aurelio ye escandalosu nesti sentíu). L'informe, que rexistra la resquiebra dixital qu'hai ente conceyos grandes y pequeños, aconseya-yos a tolos ayuntamientos qu'igüen redes internes particulares que faigan l'alministración más rápida.