Les térmiques de La Ribera, tresfondu de la película nueva d'Antonio Quirós

El director de cine asturianu José Antonio Quirós entama esti llunes el rodaxe de la que va ser la so segunda película "Cenizas del cielo". L'autor de "Pídele Cuentas al Rey" va tratar otra vez un tema rellacionau cola vida n'Asturies del nuestru tiempu. Ello ye que los protagonistes de "Cenizas del Cielo" conviven con una central térmica nel so pueblu. L'actor Celso Bugallo encabeza'l repartu de la cinta, que va contar tamién con Clara Segura, Gary Piquer, Fran Sariego, Beatriz Rico o Txema Blasco ente otros

La productora catalana Bausan Films ye la responsable d'esta "comedia naturalista" ambientada nel imaxinariu "Valle Negrón" onde llega'l periodista inglés Paul Ferguson, especialista en guíes turístiques y que namás conoz d'Asturies que tien una princesa y un pilotu de Fórmula 1. Anque l'inglés cuenta con andar pelos conceyos de la costa y ver monumentos, una avería déxalu allancáu al llau de la central térmica que marca la vida de los protagonistes, encabezaos por Federico, un home de sesenta años que lleva tiempu lluchando contra la contaminación de la térmica, y que s'enfota en que'l Protocolu de Kyoto va obligar a pesllala, anque la empresa eléctrica tien planes p'ampliar la central. La trama d'intereses, col periodista inglés de testigu, queda asina preparada.