Les subvenciones al asturianu mengüen un 3,88 por cientu y pierden trés llinies d’ayudes

La Conseyería d’Educación, Cultura y Deporte concede nesti 2013 un total de 308.000 euros de subvención pa la normalización del idioma. Ello supón una mengua del 3,88 por cientu con respeuto a les ayudes del añu pasáu.

Como s’esperaba, nesta convocatoria desapaecen trés llinies d’ayudes al asturianu y al gallego-asturiano: a les d’actividaes d’asociaciones y otres entidaes ensin ánimu d’arriquecimientu, a les d’empreses privaes y a la promoción d’actividaes cinematográfiques y de videu. Por contra, caltiénense les subvenciones a la producción editorial, a la discográfica y a los medios de comunicación. El montante total de l’ayuda ye de 308.000 euros, 12.248,63 euros menos que l’añu pasáu (320.428,63 euros), lo que supón una mengua total del 3,88 por cientu.

El recorte de llinies de subvención provoca que, pese a esa reducción de 12.248,63 euros, xuban les perres destinaes a les trés estayes que sí mantienen les ayudes. Asina, el dineru destináu pa la producción editorial pasa de 84.480 euros a 100.000; la discográfica, de 24.000 euros a 40.000; y a los medios de comunicación, de 127.759,63 euros a 168.000 euros.

Hai que recordar que les cantidaes del 2012 sufrieron una mengua de 60.771,37 euros, tres la entrada del Gobiernu del PSOE nes eleiciones de mayu, con respeuto a les ayudes convocaes pol Executivu de Foro, qu’ascendíen a 381.200 euros. Estes cifres iniciales yá suponíen una reducción de más de la metá con respeuto a a les ayudes del añu anterior.

Na semeya, la conseyera Ana González mientres un Plenu na Xunta Xeneral.