Les selecciones asturianes xueguen esti fin de selmana

Les selecciones asturianes absolutes de Hockey y Fútbol xueguen esti fin de selmana los tradicionales partíos de navidá. La selección de hockey va ser la primera, xugando esta tarde contra Portugal no que se prevé que pue ser un partíu de los buenos, en cuantes que Portugal ye una potencia nesti deporte con catorce campeonatos del mundu, mientres que l'equipu asturianu, que va ser la primer vez que xuegue, tampoco nun ye precisamente mancu, incluyendo xugadores del Cibeles, Areces y Mieres y bien d'asturianos que tan n'equipos catalanes de la lliga estatal. La cita ye a les 8 d'esta tarde nel palaciu de deportes d'Uviéu

Mañana sedrá la selección de fútbol a la que-y toque xugar contra Honduras a les siete de la tarde nel estadiu Suárez Puerta d'Avilés, que tien grades supletories pa la ocasión coles que llegará les 10.000 localidaes d'asientu. La mala noticia ye que Juanele, que marcó goles nos dos partíos anteriores, va ser baxa por lesión muscular, lo que-y quita a la selección a ún de los fútbolistes más apreciaos pol públicu. L'arbitrio del partíu va ser l'asturianu Mejuto González, árbitrio internacional dende 1.999 y que l'añu pasáu pitó la final del mundial sub-20 n'Arxentina. Asturies.com va ufiertar a los sos llectores un reportaxe fotográficu de dambos partíos.