Les restricciones de la fase 2 modificada amplíense hasta'l día 13

La Conseyería de Salú activa la tercer prórroga al tar el país nun "escenariu de tresmisión comunitaria sostenida".

Les restricciones afitaes el 14 d'ochobre pa facer frente a la crisis sanitaria ocasionada pola COVID-19 van ampliase dos selmanes más, hasta'l 13 d'avientu. Éstes yeren, principalmente, la prohibición de la celebración d’amagüestos –“actividaees lúdiques serondiegues” reza la resolución–, la imposibilidá pa la hostelería d’emplegar les barres –otru mandáu posterior mandó pesllalos–, l’impedimentu de vender alcohol más allá de les 22 hores pa los comercios minoristes o d’usar les duches y vestuarios de los centros deportivos –tamién tán anguaño trancaos–, y el tope de 6 persones non convivientes pa los axuntamientos en llugares públicos o privaos.

Les autoridaes sanitares consideren qu'Asturies ta nun "escenariu de tresmisión comunitaria sostenida y anque nos díes últimos s'observa un descensu en dalgunos indicadores, la situación ha de siguir considerándose de riesgu mui altu o estremu, polo que resulta imprescindible siguir calteniendo les midíes establecíes", esplica la resolución espublizada'l vienres nel BOPA. Éstes van siguir, salvo prórroga nueva, hasta'l domingu 13 d'avientu, inclusive.

Na semeya, el conseyeru Pablo Ignacio Fernández Muñiz, a la derecha, xunto con miembros del so equipu, nel aconceyamientu telemáticu del Consejo Interterritorial del Sistema Nacional de Salud del miércoles.