Les representaciones de les obres finalistes del IV Premiu Nel Amaro adelántense a ochobre

|
'El viaxe de Covaletti', d'Higiénico Papel

Yá se conocen les cuatro obres finalistes del IV Premiu y Festival Nel Amaro de Teatru Profesional en Llingua Asturiana o Gallego-asturiano, que se van representar nel Filarmónica nesta ocasión n’ochobre, un mes enantes de lo habitual. Repite una ganadora, Higiénico Papel, y aspiren a facelo per primer vegada Producciones Nun Tris, El Callejón del Gato y Fantastique Company.

El teatru uvieín acueye una añu más la parte del festival del gallardón entamáu pola Conseyería de Cultura, Política Llingüística y Turismu “cola mira de consolidar, arriquecer y prestixar la llingua asturiana y el gallego-asturianu nel ámbitu del arte dramáticu”. Les cites van distribuyise ente los cuatro primeros vienres d’ochobre, n’horariu entovía por confirmar.

La primer representación, el día 2, que va concidir cola celebración del XLI Día de les les Lletres Asturianes, va corresponder a Nun Tris, finalista nel 2017 y nel 2018, que nesta ocasión presenta ‘El pelegrín valiente’. Una selmana más tarde, el 9, el turnu va ser pa El Callejón del Gato, que yá llegó a esta fase l’añu pasáu, pa poner n’escena ‘La neña de les trences al revés’.

Higiénico Papel, ganador de la segunda edición, correspondiente al 2018, con ‘Hansel y Gretel’, y siempre finalista, torna a tar ente les cuatro meyores con ‘El viaxe de Covaletti’, que va representar el día 16. Por último, el 23 van xubir a les tables del Filarmónica unos debutantes, Fantastique Company, que compiten con ‘El viaxe de Dorothy’.

Un xuráu conformáu por espertos del sector y presidíu por Antón García, direutor xeneral de Política Llingüística, escoyó a los cuatro finalistes que busquen llevar un gallardón valoráu anguaño en 6.000 euros. Los ganadores n’ediciones anteriores foron Carlos Alba ‘Cellero’, con ‘Llázaro de Tormes’ (2017); Higiénico Papel, con ‘Hansel y Gretel’ (2018); y Factoría Norte, con ‘Les rellaciones peligroses’ (2019).

Na semeya, un momentu de la representación de 'El viaxe de Covaletti' d'Higiénico Papel, única compañía finalista que yá cuenta con un Nel Amaro.

Contador Estadistiques