Les Presidenciales d'Arxentina son pa Massa, que va dir a segunda vuelta con Milei

El candidatu peronista da la sorpresa al superar al favoritu nes encuestes.

Sergio Massa, d'Unión por la Patria, ganó la primer vuelta de les eleiciones presidenciales d'Arxentina celebraes ayeri al algamar el 36,68 por cientu de los votos. Al nun llegar al 45 por cientu que marca la llei arxentina nin consiguir un 40 y una diferencia de 10 puntos col segundu candidatu con más apoyos, va tener que dir a una segunda vuelta con Javier Milei, de La Libertad Avanza, que rexistró un 29,98 por cientu.

D'esta forma'l mieu d'una victoria del ultraderechista, ganador de les primaries y, según toles encuestes, favoritu de los arxentinos pa la cita d'ayeri, queda amenorgáu. El 19 de payares los eleutores han de decidir agora ente Milei o Massa, actual ministru d'Economía del Gobiernu d'Alberto Ángel Fernández, como'l dirixente del país pa los cuatro años próximos.

Bullrich, fuera de la carrera

Los ciudadanos teníen cinco opciones nes Presidenciales. La entrada de Milei dexó fuera de la carrera a la candidata de la coalición de centroderecha Juntos por el Cambio, Patricia Bullrich, que recibió un 23,83 por cientu de votos.

Juan Schiaretti, d'Hacemos Nuestro País, quedó con un 6,78 por cientu, y Myriam Bregman, del Frente de Izquierda y de Trabajadores-Unidad, con un 2,70 por cientu.