Les pensiones asturianes, penriba de la media

Los pensionistes asturianos disfruten de les segundes pensiones más altes del conxuntu estatal a poca distancia tres de los vascos, según diz na última actualización del Boletín d'Estadístiques Lllaborales. La pensión media de los xubilaos y xubilaesasturianos n'avientu del 2.002 algamó los 739.34 euros, por 764.93 de los vascos. La tercer media más alta ye la madrileña con 723.46 euros, y toles demás comunidaes queden perbaxo de los 700 euros, llegando a la media más baxa de Galicia, que ye de 482.13 euros.

283.300 asturianos y asturianes cobraben dalgún tipu de pensión n'avientu del 2.002, lo que da una idega de la importancia de los ingresos de les pensiones na economía asturiana. Si amás se tien en cuenta que la población asturiana ta perbaxo del millón cien mil persones, resulta que sobre'l 26'4% de los asturianos dependen de dalguna pensión, colo que resulta que cásique toles families tienen un pensionista aportando ingresos a la unidá familiar. La cuantía de los ingresos por pensiones tamién tien efectu nos precios de determinaos servicios y mercancíes, tirando p'arriba por ellos por aciu del fuerte nivel adquisitivu qu'enxerten en mercáu.

Otra cosa mui distinta son les desigualdaes ente los estremaos tipos de pensión esistentes. Anque dientro de cada grupu hai diferiencies mui grandes, los 283.300 pensionistes asturianos repártense ente 31.100 que cobren por invalidez permanente, que son de media de 770.94 euros. Les más de les pensiones son de xubilación (161.700) con una media de 739.34 euros, siendo esti grupu el que más desigualdá interna tien, con pensiones mui altes como les del réxime de la minería del carbón, que lleguen a los 1,225.27 euros de media. Finalmente, les 80.300 pensiones de viudedá asturianes reciben de media 391.03 euros.