Les Patrulles Osu retiraron 20 llazos illegales nel occidente asturianu no que va d’añu

Diecinueve n’Ibias y ún en Tinéu. Les Patrulles Osu de la Fundación Osu Pardu retiraron un total de 20 llazos illegales pa la caza de xabalinos, corzos o venaos que tamién pueden atrapar otra fauna, como osos.
 
Estes patrulles, con base en Cangas del Narcea, Vil.lablinu (Lleón) y Os Ancares (Lugo), dedíquense a la vixilancia y siguimientu de les poblaciones d’osu, amás de lluchar contra’l furtivismu y trabayar na educación medioambiental. Dende la so creación, nel 1992, retiraron 1.476 llazos illegales, 28 no que va de añu: 19 n’Ibias, ún en Tinéu y ocho en Cervantes (Lugo). Estes trampes, que taben situaes en zones de praos, fayeos y carbayos, nun tán destinaes a los osos, anque sí que pueden afeutar a esti mamíferu en pelligru de desanición.
 
Otra manera, la Fundación Osu Pardu anunció que ye favorable al treslláu d’osos de la zona occidental a la oriental pa favorecer el crecimientu de la población del llugar mediante cruces artificiales. Nel hábitat del mamíferu en territoriu asturianu, lleonés y palentín namái viven dos femes con críes, mentes que na zona de Lugo, occidente de Lleón y d’Asturies, hai 25 oses.