Les pantalles de Renfe de les estaciones de Xixón y Uviéu siguen ensin respetar la toponimia oficial

La Xunta pola Defensa de la Llingua Asturiana (XDLA) detecta munchos incumplimientos nel usu de la toponimia tradicional, única oficial, por parte de Renfe y Adif. Por exemplu cita l’ausencia de los nomes de llugar correutos nes pantalles de la estación de Xixón y Uviéu, ente otros, al tiempu qu pide responsabilidá al CTA nel mesmu sen.

Un añu depués de que la operadora de la rede ferroviaria y la so xestora, de manera respeutiva, entamara a emplegar la toponimia oficial depués del interés puestu pola Direición Xeneral de Política Llingüística, depués de aconceyar cola XDLA por mor del ‘Informe sobre l’incumplimientu de la toponimia oficial na rede de ferrocarril d’Asturies’, en treslladar esta problemática al Ministeriu de Tresportes, Movilidá y Axenda Urbana, entovía queden cuestiones pendientes. Por esti motivu reclama “a dambes entidaes un usu más rigorosu y integral, con atención especial a les redes sociales, páxines webs y aplicaciones móviles”.

Ente les cuestiones pendientes esti coleutivu rescampla l’usu de topónimos derogaos nes pantalles de Renfe nes estaciones de Xixón y Uviéu –que conviven coles de Feve, onde sí apaecer los nomes de llugar correutos– nin nes del interior de los trenes. Los avisos sonoros tampoco nun cumplen cola llegalidá.

“Un campu con muncha difusión y al que tovía nun llegó la normalización toponímica son les aplicaciones móviles oficiales de les dos compañíes (Adif y Renfe Cercanías), les páxines webs (nel casu de les Cercaníes Renfe nun hai presencia nenguna de la toponimia oficial; nel casu de Feve, sí apaez nel buscador d’estaciones pero de manera incorreuta porque figura a continuación de la forma que yá nun ye oficial) y les redes sociales”, añaden.

Importancia del CTA

El Consorciu de Tresportes d’Asturies (CTA), entidá dependiente de la Viceconseyería d’Infraestructures, Movilidá y Territoriu de la Conseyería de Mediu Rural y Cohesión Territorial “manexa cientos de topónimos na so actividá diaria en vehículos, anuncios, señales, horarios, web, etc.”, sigue la XDLA, que critica que “depués de cuasi venti años de la oficialización de los primeros topónimos” esta entidá “sigue incumpliendo la llegalidá toponímica”. “Ye fundamental el papel de normalización social que xuega” entiende’l coleutivu.

“El Gobiernu asturianu, si de verdá quier demostrar el so compromisu cola recuperación toponímica, tendría que dase cuenta de la importancia que la CTA tien nesti aspectu. Ye una de les munches coses que’l Gobiernu d’Adrián Barbón podía tener feches yá nesta llexislatura. Nun ye cuestión de consensos nin d’amabilidaes. Trátase de cumplir cola llegalidá”, rescampla.

Na semeya, pantalla de Renfe na estación de Llamaquique.