Les opciones asturianes pa Europa

Foro, en solitariu, y Andecha Astur, dientro de Los Pueblos Deciden, son les candidatures asturianes pa les Europees, mientres que Compromisu sofita a Podemos. Vallina (IX), Garriga (PP) y Fernández y Muñiz (PSOE) opten a un escañu.

 

Argimiro Rodríguez ye’l candidatu de Foro de Ciudadanos pa la cita del 25 de mayu, onde tán en xuegu 54 escaños que-y correspuenden al Estáu español –el total d’europarllamentarios ye de 751–. Viceconseyeru d’Educación y Formación Profesional nos diez meses de Gobiernu de Foro n’Asturies, esti llicenciáu en Filoloxía Angloxermánica pola Universidad d’Uviéu y caderalgu d’Inglés d’enseñanza secundaria con esperiencia tien la tarea difícil de llevar el pesu de la campaña d’unes eleiciones na que la formación asturiana tien casi imposible algamar representación.

 

Los Pueblos Deciden, coalición formada por Andecha Astur, EH Bildu, BNG, Puyalón de Cuchas, Alternativa Nacionalista Canaria y Unión del Pueblo, cuenta con llegar al escañu. Nel casu de consiguilo ésti diría pa Josu Juaristi, periodista nacíu en Azkoitia (Gipuzkoa), direutor del ‘Gara’ ente 2004 y 2011 y anguaño del suplementu dominical d’esti diariu vascu, ‘7K’. La primer asturiana de la llista ye Dulce María Gil, col númberu 15. Completen la presencia d’Andecha na federación de partíos Paulo Arboleya (númberu 24) y Arturu Xosé Bermeyu (32), tando como suplentes Xicu Xabel Fernandi Güerta y María Sonia Díaz.

 

La segunda formación asturiana en votos nes eleiciones últimes a la Xunta Xeneral tres Foro, Compromisu por Asturies, nun va participar nes Europees, anque sí da’l so sofitu a la candidatura de calter estatal Podemos que lidera’l profesor universitariu madrilanu Pablo Iglesias, popular poles sos apaiciones en dellos alderiques televisivos. Con posibilidaes tamién d’algamar representación n’Europa, nengún militante de Compromisu participó nes Primaries de la formación, anque sí hai asturianos nos primeros puestos de la llista: Tania González (númberu 6) y Estefanía Torres (8).

 

Asturianos en disposición de consiguir representación

 

Una asturiana que sí ta en disposición d’algamar un escañu, según los resultaos de delles encuestes, ye Ángela Vallina. L’alcaldesa de Castrillón por IX-LV ocupa’l númberu 6 de la llista de La Izquierda Plural, coalición eleutoral liderada por Izquierda Unida y conformada por Confederación de Los Verdes, Construyendo La Izquierda-Alternativa Socialista, Iniciativa per Catalunya Verds, Esquerra Unida i Alternativa, Els Verds-Opció Verda, Anova-Irmandade Nacionalista, Espazo Ecosocialista Galego, Gira Madrid-Los Verdes, Batzarre y Ezkerreko Ekimena-Etorkizuna Iraztarri.

 

Tien opciones de repetir como eurodiputáu Salvador Garriga, númberu 22 de la lista del Partido Popular (PP), al igual que María Muñiz, candidata 21 del PSOE. Mentes, ta en puestos de salida del PSOE l'uviedín Jonás Fernández (14). Por contra, l’otru asturianu que ta anguaño n’Europa, el socialista Antonio Masip, abandona’l so escañu.