Les obres d'arreglu de la esplanada de Cuadonga corten el tráficu

Del llunes al vienres los vehículos namái podrán llegar hasta la rotonda onde comienza la carretera que xube a los Llagos.

Les obres d'acondicionamientu de la esplanada de la basílica de Cuadonga van obligar a cortar la carretera d'accesu al Real Sitiu per 5 díes. L'accesu va tar abiertu namái a turismos y vehículos de repartu hasta l'Arcea Gran Hotel Pelayo.

El corte va comenzar a les 8 hores y va finar a les 20 hores del vienres, momentu nel que va restablecese la circulación pa facilitar l'accesu a visitantes mientres la fin de selmana. La Conseyería d'Infraestructures, Mediu Ambiente y Cambiu Climáticu empecipió a primeros d'esti mes les obres na escamplada, que suponen una inversión de 433.277 euros y ta faciéndose en trés fases.

Asina, con un plazu d'execución de trés meses, les actuaciones planiáronse teniendo en cuenta la meteoroloxía y les visites turístiques al santuariu. Una tercer parte de la obra va executase no que resta d'añu, otra en primavera y la postrera n'ochobre del 2020, cola mira d'interferir lo menos posible nel accesu al Real Sitiu.

Los trabayos consisten na reposición del pavimentu dañáu dende la plaza de la Basílica hasta l'empiezu del accesu piatonal a la Santa Cueva, nun estáu llaceriosu anguaño, incluyendo la zona de rodadura, la vía sacra y los aparcamientos asitiaos frente a les cases de los canónigos. Nestos llabores utilícense los mesmos materiales qu'esisten na actualidá, sacante na zona d'aglomeráu asfálticu frente a les cases de los canónigos, que va sustituyise por piedra caliar Griotte.

Na semeya, estáu de la esplanada de Cuadonga enantes del comienzu de les obres.