Les 'Nueches Prehistóriques' lleguen a Teberga esta fin de selmana

El Parque de la Prehistoria de Teberga acueye esta fin de selmana trés ‘Nueches Prehistóriques’, que piesllen el programa de ‘Viva les Nueches’. Dixebra va ufrir un conciertu de baldre’l sábadu na instalación museística a les 22.30 hores.
 
Les sesiones que conformen les ‘Nueches Prehistóriques’, previstes pal vienres, sábadu y domingu, tán diseñaes por Factoría Norte y Producciones Quiquilimón. Asina, los visitantes van poder conocer, al traviés d’un ‘chamán’, la vida cotidiana de los sos antepasaos: música, danza o costumes alimentaries. Trátase de “un viaxe nel tiempu nel que s’entemecen la naturaleza, les visiones y los ritos”, selalen dende la organización.
 
Les visites pa presenciar esti espectáculu, que lleva’l nome de ‘El mito de Anul’, tán programaes pa les 20.15, 21.30 y 22.45 hores los tres díes, a esceición del sábadu, nel que nun va haber la sesión última pola actuación de Dixebra prevista nel Parque Prehistóricu de Teberga pa les 22.30 hores. El preciu de la entrada ye de 8 euros, 6 cola entrada reducida –presentando’l ticket de cualquiera de les otres nueches que s’organizaren enantes–. Les persones interesaes en presenciar esta forma orixinal de conocer esti muséu pueden reservar plaza nel teléfonu de pagu 902.306.600.