Les nueches celtes de Baíña y Porcía, cites principales d’esta fin de selmana

Un añu más, Baíña y Porcía entamen les sos nueches celtes, dos clásicos nel calendariu festivu asturianu. La folixa en Mieres va tener llugar esti vienres, mentes que’l sábadu la cita cola música de raigañu celta va ser n'El Franco.
 
La ‘Nueche + o – Celta’, nome col que se conoz a la xornada del vienres de les fiestes de Baíña, va contar esti añu cola actuación de trés bandines: la Bandina la Curuxa, Degañan’s y la Banda de Santi Caleya. Los conciertos van principiar a les 23 hores.
 
Mentes, el sábadu, l’alameda de Porcía va acoyer la XIX Noite Celta, la más antigua de les que se celebren nel país. L’Asociación Cultural Alameda tien preparao un cartelu de calter internacional, cola presencia de los bretones Startijenn y los gallegos Milesios Folk, a los qu’hai que sumar les formaciones asturianes Herbamora y Pingarata Folk Band, amás de la Banda de Gaitas Marino Tapiega. Como ye vezu, tolos asistentes van poder esfrutar de les riquísimes sardines na chapa que prepara de baldre la organización nesta cita máxica. L’hora d’entamu de les actuaciones ta prevista pa les 22.30 hores.