Les neñes y neños de Corvera escriben un añu más les sos cartes a los Reis Magos n’asturianu

|
Cabalgata de Reis Magos de Corvera

El Concursu Carta a los Reis Magos n’Asturianu afala a les neñes y neños de Corvera a escribir un añu más la so carta a les sos maxestaes d’oriente na so llingua materna. Les escueles del conceyu ta trabayando estos díes en clase de Llingua Asturiana con elles y el Conceyu va repartir llibros y perres pa material escolar.

Esta iniciativa consiste en facer la carta a los Reis Magos n’asturianu. Pa ello, distribuyóse pelos centros de Primaria un modelu pa que’l centenar d’escolines y escolinos de Llingua Asturiana y Lliterartura de los dos ciclos puean pidir los sos deseos y regalos a Melchor, Gaspar y Baltasar.

Les cartes han d’entregase darréu nel Centru Sociocultural de Les Vegues demientres esti mes. Ente toles presentaes, la Casa de la Llingua va entregar un lote de llibros n’asturianu, col envís d’animar a la llectura a los más pequeños, y un vale por valor de 100 euros pa mercar material escolar nos comercios corveranos a la carta meyor escrita n’asturianu en caún de los dos niveles educativos.

Los premios, nos que collaboren la Direición Xeneral de Política Llingüística y l’Asociación d’Ames de Casa de Les Vegues, van repartise tres la cabalgata del 5 de xineru.

Contador Estadistiques