Les negociaciones ente'l SESPA y el SIMPA nun lleguen a bon puertu

El Serviciu de Salú del Principáu d’Asturies (SESPA) y el Sindicato Médico Profesional de Asturias (SIMPA) nun son quien a llegar a un alcuerdu. L’aconceyamientu d’esti miércoles, pese a los avances del llunes, nun dio frutos.

Dambes partes tornaben a reunise pa intentar resolver la situación plantegada n’Asturies, con un conflictu que llevó a la sanidá asturiana a sumar decenes de xornaes de fuelga. Cola aplicación de la xornada llaboral nueva n’Asturies, non sólo el SIMPA, sinón otros sindicatos, entienden que l’Executivu sobrepasó les sos funciones y qu’aprovechó pa introducir reformes que van en contra de derechos de los profesionales.

El tema principal de rocea ente’l SIMPA y el SESPA sigue siendo’l descansu posterior a la guardia que reclamen los médicos. L’ausencia d’un alcuerdu na reunión de güei caltién los paros convocaos pol sindicatu tolos llunes, miércoles y vienres d’esti mes.