Les mocedaes d'Izquierda Asturiana preparen el cursu políticu

La organización de mocedá del partíu políticu Izquierda Asturiana celebró esti sábadu un alcuentru nacional nel qu'escoyó dirección y preparó la so estratexa pal cursu políticu qu'entra

N'Asamblea Xeneral, presentáronse ponencies sobre los temes más importantes de la política que Mocedá d'Izquierda Asturiana vien desendolcando. Aprobáronse una definición y unos oxetivos xenerales de la propia organización, y lleóse una ponencia ideolóxica que va debatise internamente nes próximes selmanes col envís d'aprobala y publicala en breve. Nella queden espeyaos tolos ámbitos de trabayu políticu de MIAS: la mocedá d'Asturies, l'ecoloxismu, l'asturianismu, el nacionalismu d'izquierda, el republicanismu, los derechos humanos, la solidariedá y los desequilibrios sociales, la cooperación internacional, la globalización, la soberanía y l'autodetermín, la rellación d'Asturies col estáu español, la rellación d'Asturies cola Unión Europea, el pacifismu, la política llingüística, la cultura, la vivienda, el trabayu, la sexualidá, l'ociu, les polítiques d'igualdá, la participación y l'asociacionismu xuvenil.

La organización entamó tamién a preparar les sos propuestes preelectorales de mocedá y configuró l'órganu de representación de MIAS, la Dirección Nacional, que tien de portavoz nacional a Carlos Suari Rodrigue, de 23 años, escritor y estudiante de Ciencies de l'Actividá Física y del Deporte y d'Antropoloxía Social y Cultural. Xunta elli va funcionar una "rede técnica" na que figura como Secretariu de Comunicación y Nueves Tecnoloxíes Xuacu Rodríguez Morón, de 22 años, cocineru y estudiante de Ciencies Polítiques. Almudena Suárez Flórez, de 16 años y estudiante de Bachilleratu, y Iyán González Castro, de 21 años y estudiante de Xeoloxía, completen esta estaya, mientres que paralelamente creóse una "rede política" encabezada por Clara Díez Márquez, de 17 años y estudiante de Bachilleratu, Carlos Fernández Fuente, de 27 años y llicenciáu n'Económiques, Paula Fernández Montes, de 20 años y estudiante de Filoloxía Inglesa y Xandru Blanco Huergo, de 18 años y estudiante de Filoloxía Clásica.