Les mazcaraes ibériques van protagonizar les dos primeres xornaes del Festival Arcu Atlánticu

|

Esti sábadu va dar entamu’l Festival Arcu Atlánticu, certame que busca siguir los pasos del de Lorient/An Oriant, anque ensin la etiqueta ‘celta’. Dos desfiles cola presencia de delles mazcaraes van protagonizar les primeres xornaes del eventu.
 
La inauguración oficial del festival va tener llugar mañana, a les 20.30 hores, nel Teatru Xovellanos con una gala que va tar dividida en dos partes. Na primera, van actuar la Orquesta Sinfónica y el Coru de Voces Blanques del Conservatoriu de Mñusica de Xixón, mentes que na segunda va tener lllugar un conciertu de la Orquesta Céltica Asturiana, formación con miembros de Gueta na Fonte. El preciu del espectáculu ye de 10 euros.
 
Darréu, alredor de les 22.30 hores, va celebrase un desfile con mazcaraes procedentes d’Asturies, Navarra y Galicia que va salir del Paséu de Begoña. Nél, amás de Los Sidros y Les Comedies de Valdesoto, tamién van participar l’Altsasuko Inauteriak, d’Altsasu/Alsasua, y Os Boteiros y Folión de Viana do Bolo. Al día siguiente, a les 12.30 hores, les trés mazcaraes van volver a desfilar, anque nesta ocasión acompañaos de Los Guirrios y les Madames de Llamas de Ribera (Lleón) y Os Reises d’El Valledor, amás de por bandes de gaites y grupos folclóricos. La marcha va salir del Paséu de Begoña y va terminar en L’Atalaya, onde va celebrase una xinta y deportes y xuegos tradicionales gracies a la participación de la xente de 6 Conceyos.
 
Otres actividaes previstes pal primer domingu del Festival Arcu Atlánticu son los xuegos tradicionales entamaos nel Xardín Botánicu Atlánticu, ente les 17 y 19 hores, pola Tertulia Cultural El Garrapiellu pa neños y neñes a partir de 6 años, previo pagu de 3 euros la hora, y l’amuesa d’arrastre de piedes por gües, que va tener llugar na Plaza Mayor a les 11 hores cola participación d’Iñigo Aurrecoetxea. Amás, xixoneses y visitantes van poder visitar dende'l domingu les carpes instalaes en Campu Valdés, con una amuesa de productos y artesanía de Portugal, país al que ta dedicada esta primer edición del certame, y na playa d’El Natahoyo, venceyaes de manera principal a la náutica.

Contador Estadistiques