Les centrales sindicales CC.OO y UXT van celebrar la fiesta del 1 de mayu, Día Internacional del Trabayu, con una manifestación n'Avilés, una marcha que va reclamar un nuevu pautu social cola industria , l'empléu de calidá y la igualdá ente xéneros como exes prioritarios.
D'otra manera, los sindicatos CSI, CXT, Suatea y Sindicatu Ferroviariu organicen con motivu de la fiesta del Primeru de mayu, Día Internacional del Trabayu, una manifestación en Xixón.
La marcha va salir a les 12.00 hores de la Plaza de l'Umedal, y el tema central de la mesma va ser la refuga a la política "represiva" que n'Asturies afecta a munches persones y colectivos sindicales, que ven la so actuación "criminalizada por defender los derechos llexítimos de los trabayadores" o por "enfrentase a la corrupción urbanística".
Los sindicatos convocantes de la marcha de Xixón conviden a tola ciudadanía asturiana a participar na marcha defendiendo "los derechos d'una Asturies ond'el desmantelamientu industrial y avancen les privatizaciones" y onde'l Gobiernu "aporfia en matar les voces crítiques, casu de les condenes a los sindicalistes Carnero y Morala" anque les organizaciones convocantes opinen que la política represiva nun afecta namás a los representantes de la CSI y qu'esta afecta a tolos trabayadores que defenden los sos puestos de trabayu.