Les llingües ibériques alcontráronse n’Uviéu na presentación de ‘Aire, fuego y deseo’ de García Hoyuelos

|
Presentación n'Uviéu de 'Aire, fuego y deseo'

Un recital poéticu-musical nel llar de l’Academia de la Llingua Asturiana (ALLA) sirvió esti llunes de presentación n’Uviéu del llibru-CD ‘Aire, fuego y deseo’, de Juan Carlos García Hoyuelos, nel que tán presentes toles llingües ibériques. Iniciativa pol Asturianu encargóse de la organización del actu, nel qu'actuó'l cantautor Toli Morilla.

El secretariu de la institución académica, Xosé Ramón Iglesias Cueva, exerció d’anfitrión. Xunto a él intervino’l propiu García Hoyuelos y Inaciu Galán, presidente d’Iniciativa pol Asturianu, que destacó que “nestos meses previos a les elecciones, que van ser tan decisivos pal futuru del idioma y d’Asturies, ye clave siguir amosando que del llau de la oficialidá tamos los que construyimos una Asturies meyor, más plural, más bayurosa, más respetuosa col diferente; una Asturies que cumple y desendolca la Constitución española”.

Tuvo bones pallabres pal autor, burgalés nacíu en Basauri, “un home nel que la llingua asturiana tien un encontu na so difusión y promoción per otros territorios peninsulares y d’otros llugares. Dende va años vien poniendo atención nel asturianu dientro de la so esmolición poles llingües que nun tuvieron la suerte hestórica que tien la que ye la so llingua materna, el castellán”. “Nun se m’ocurre meyor actu pa entamar estos meses, col Día Internacional de la Llingua Materna nel horizonte más cercanu, qu’amosar la convivencia de les llingües como lo fai Juan Carlos nos sos llibros, con naturalidá, con normalidá y con ciñu, nun abrazu que mos hermana”, finó Galán.

Nel mesmu participaron Xosé I. Pidal Montes (poeta), Xuan Miyar (xubilaú y facedor pola llingua), Roberto González-Quevedo (poeta, antropólogu lleonés y miembru de l’ALLA), Víctor Suárez (escritor, profesor y traductor), Nel Morán (escritor), Quique Díez Fernández (estudiante de Filosofía), Nicolás Bartolomé Pérez (escritor lleonés miembru de l’ALLA) y Fernán Morán (presidente de la Lliga Celta d'Asturies). Tamién tuvo presente’l cantautor Toli Morilla, qu’interpretó’l poema ‘Magar la distancia’ depués de que sintieren dellos de los cantares nel restu de llingües ibériques que recueye’l CD de ‘Aire, fuego y deseo’.

Versos del autor

García Hoyuelos agradeció a los presentes l’asistencia al actu y dedicó unos versos escritos pa la ocasión:

Ahora que está más cerca, recordad
que el horizonte sigue a la misma distancia,
ahora que llegan las promesas, las ráfagas de fotos,
conviene no distraerse en aquellos
que buscan retratarse
cada cuatro años junto a nosotros.
Ahora toca el SÍ, pero si fuese no,
seguiremos por la misma senda,
con el mismo convencimiento, igual propósito.
¡Se conseguirá!

Es cuanto menos curioso
que una misma lengua
sea oficial en Portugal,
mientras sus raíces,
Asturias y el País Leonés,
en las montañas de los astures,
moran sin ningún rubor
los profanadores de la LLINGUA.
Algún día, estoy seguro,
esos mismos afirmarán
que gracias a ellos
llegó el asturllionés a la sociedad
como lengua de tolerancia.

Pa finar, apuntó, “emulando palabras de Pascual Maragall: en la oficialidad, lo que es bueno para Asturias también lo es para su hermano, el País Leonés, y lo que es bueno para el País Leonés, de igual manera lo será seguidamente para Extremadura”. Exemplares de ‘Aire, fuego y deseo’ pueden mercase por 14 euros al traviés d’Iniciativa pol Asturianu, que recibe un 25 por cientu de cada venta pa la financiación de les sos actividaes.

Na semeya, Galán, Iglesias Cueva y García Hoyuelos, presidiendo la mesa.

Contador Estadistiques