Les gaites tomen Candás

Esta fin de selmana celébrase’l XIX Festival de Bandes de Gaites Villa de Candás, con 6 bandes d'Asturies, Galicia y Bretaña, y conciertos de N’Arba, Borja Baragaño Tríu y Camille Levecque.

La Banda Gaites Candás entama esti certame nel que van participar formaciones procedentes d’Asturies, Galicia y Breizh. L’actividá principia esta tarde a les 19 hores con un pasucais y conciertu de la Bagad Sonerien Bro Dreger bretona n’El Paseín, pa depués dar pasu a la Banda Gaites LaKadarma en La Baragaña. La plaza Bocata va acoyer a les 20 hores un arpicuentu de la francesa Levecque.

A les 23.30 hores va tener llugar la Nueche de Gaites peles cais de la villa, na que tomen parte amás de les formaciones bretona y naveta, la gallega Banda de Gaitas Xarabal y la Banda Gaites Candás. Zarra esta primer xornada, a medianueche, N’Arba con un conciertu na plaza Bocata, onde depués va haber escenariu llibre.

La plaza Hermanos Helio va acoyer mañana, a les 13.30 hores, la primer actuación de la xornada, la de Xarabal. Darréu la Bagad Sonerien Bro Dreger va tocar na plaza Bocata, siendo pela tarde con LaKadarma (19.30 hores, El Paseín) y la Banda Gaites Villa de Xixón (20 hores, La Baragaña).

Actividá principal del certame

Alain Fernández va encargase de presentar l’actu principal de la XIX Festival de Bandes de Gaites Villa de Candás, nel parque Les Conserveres a les 23 hores, cola participación de toles bandes convidaes y la Bandina d’Escolinos de la Banda Gaites Candás. Tres el mesmu va celebrase un pasucais que va terminar col conciertu, a la 1 de la mañana, de Borja Baragaño Tríu.

El domingu, día caberu del festival, va abrir la xornada tamién Xarabal, nesta ocasión a les 14 hores na plaza Bocata. Nesi mesmu llugar, a les 18 hores va celebrase’l II Concursu de Pareyes de Gaita y Tambor, y, a les 20 hores, el II Concursu de Cuerpos de Percusión Villa de Candás. Va poner el ramu Lavecque con un conciertu que va principiar a les 21.15 hores.