Les fiestes del Carme de Caldones miren a la tradición

Empiecen el xueves cola corta del arbolón y celebren el V Refaciendo Tradiciones el vienres, qu'inclúi una Nueche en Danza.

La fiesta céntrase especialmente mañana, anque esta tarde, a les 17 hores n'El Reburiu (barriu de Garbelles), los mozos y moces d'esti pueblu xixonés van trabayar en man común na corta del arbolón d’esti añu, donáu por Marina’l Mecheru, de la casería Casa Ramirín. La actividá ye abierta a toles persones que quieran andechar o, simplemente, dir velo y echar un culín.

La romería entamada pola Comisión de Fiestes La Rebollada arrancará como tal col V Refaciendo Tradiciones, una candonga d’un día dedicada la revitalización y los curiaos de delles tradiciones en Caldones. La corta y plantáu del arbolón, la foguera y la nueche en danza son les principales señes d’identidá del primer día de fiesta nesta collación rural asitiada nel Valle Altu’l Ríu Muriel. Como novedá esti añu recupérase l’alderique sol baille tradicional que se fixera de mou esperimental nel 2012, naquel momentu embaxo’l títulu 'Conxusta al rodiu'l baille nel folk asturianu', nel que participaron dellos músicos del folk asturianu.

Nesta ocasión la temática ye 'Alderique sol estáu de la cuestión del baille tradicional n’Asturies: desfolklorización, perspectives de futuru' y nél participarán persones venceyaes a diferentes concepciones del baille tradicional como Yolanda Cerra, Xosé Antón Fernández 'Ambás', Aida Mariño, Paulino Santirso y Rodrigo Cuevas. Arrancará a les 17 hores y va ser abiertu a tola xente que quiera participar.

Paralelamente, a lo llargo la tarde tendrán llugar más actividades. Ente elles, a les 17 hores, el taller de cómo facer una vara yerba y el concursu de sidra casero. Llueu, a les 20 hores, como ye vezu, tendrá llugar el taller d’aniciu al baille tradicional qu’impartirá Ramsés Ilesies y, una hora más tarde, tola xente del prau que lo tenga a bien collaborará plantando l'arbolón.

Al escurecer, Ánxel Antón García, que fora maestru nel colexu de Vega y de munchos escolinos y escolines del Valle Altu'l Ríu Muriel, va dar el pregón d’arranque de la fiesta. De secute, prenderáse la foguera, armaráse una danza y entamará la V Nueche en Danza de Caldones, na que, como siempre, habrá escenariu abiertu, amás de la participación de los grupos L’Andecha Turcipié y Cantaruxare Pandereteros.

Verbenes hasta'l llunes

Les fiestes del Carme van continuar hasta'l llunes con delles verbenes. El sábadu, día de la corderada, va actuar la orquesta Europea Big Band; el domingu, el Dúo Aroma; y el llunes, día del bollu, Waykas Family. Los trés díes tamién va participar la disco-móvil Vas Bailar.