Les espublizaciones de llibros n’asturianu medraron un 151 por cientu nel añu 2011

Nel 2011 espublizáronse un total de 103 llibros en llingua asturiana, lo que supón una medra del 151 por cientu en comparanza col añu anterior. Les obres escrites n’asturianu conformen el 13 por cientu del total de títulos editaos n’Asturies.

Estos datos son los recoyíos pola Axencia del ISBN, nos que nun s'inclúin los llibros catalogaos pola axencia producíos por autores-editores. Amás indiquen que les editoriales asturianes publicaron un total de 789 títulos mientres l'añu 2011 en tolos formatos –papel, dixital y otros– y en toles llingües, lo que supón un aumentu del 10,7 por cientu con respeuto al exerciciu anterior, cuando s’asoleyaron 704, anque la cifra queda lloñe de los 808 del 2009.

Del total contabilizáu esti añu, 103 obres foron en llingua asturiana, lo que supón una xuba considerable en comparanza col 2010, cuando se rexistraron 41, que suponíen un descensu del 35,99 por cientu si tomamos como referencia’l 2009 (64 títulos). Con estos datos, mientres que nel 2010 les publicaciones n'asturianu representaben el 5,8 por cientu del total, nel 2011 esti porcentaxe elevóse al 13 por cientu.

A nivel estatal, l’añu pasáu les editoriales espublizaron 97.211 llibros nes llingües del Estáu: al marxe de los publicaos en castellanu, que representen 81.825 títulos (79 por cientu), los llibros en catalán ascendieron a 10.919 títulos (11 por cientu); los escritos en gallegu, a 1.855 (2 por cientu); y los editaos n’eusquera, a 1.442 (1 por cientu).