Les esportaciones medraron un 26,53 por cientu en febreru en comparanza col mesmu mes del añu anterior

Les empreses asturianes esportaron nel mes de febreru por 314.813 miles d’euros, según datos del Direición Xeneral de Comerciu y la Delegación del ICEX n’Asturies. Ello supón una medra del 26,53 por cientu en comparanza col añu anterior.
 
Esti datu tien en cuenta la xuba de los precios de les esportaciones nun 6,1 por cientu nesi periodu, según relata l’informe de Comerciu y la Delegación del Instituto de Comercio Exterior Español (ICEX) n’Asturies entituláu ‘El comerciu esterior d'Asturies en febreru y dos primeros meses del 2011’. De nun tener en cuenta esta xuba de precios, la medra situaríase nun 34,25 por cientu.
 
L’informe reflexa que l'aumentu centróse nos seutores d'alimentos (sobre manera, mantequilla), materies primes (coques y semicoques de carbón), semimanufactures (material de construcción, fierro y aceru, y productos químicos) y bienes d'equipu (maquinaria, polo xeneral), en cuantes que los demás esperimentaron descensos que s'asitien en sobre'l 10 por cientu. Otra manera, les importaciones tamién medraron nesti tiempu, hasta algamar los 289.442 miles d'euros, lo que supón un aumentu del 26,21 por cientu. Sicasí, teniendo en cuenta que los precios de les importaciones aumentaron un 11,1 por cientu nel mesmu periodu, los datos suponen una medra del volume real de les compres nel esterior del 13,60 por cientu.
 
Si tomamos los datos de los dos primeros meses del añu, les esportaciones asturianes llegaron hasta los 633.356 miles d'euros pa rexistrar una xuba del 41,44 por cientu sobre'l mesmu periodu del 2010; un 33,31 por cientu de crecimientu real. Pela so parte, les importaciones asitiáronse nos 620.955 miles d'euros, con una medra interañal del 31,67 por cientu y un aumentu real del 18,20 por cientu pol incrementu de los precios de les compres nel esterior.