Les esportaciones medraron un 25,4 por cientu n'Asturies nel primer cuatrimestre del añu

Les empreses asturianes esportaron nel primer cuatrimestre del añu por 1.289,1 millones d’euros. Ello supón una medra del 25,4 por cientu en comparanza col mesmu periodu del añu pasáu, anque n'abril les ventes baxaron un 11,68 por cientu.
 
Estos datos recuéyense nel Informe Mensual de Comerciu Esterior ellaboráu pola direición territorial de Comerciu y la delegación del Instituto de Comercio Exterior Español (ICEX) en Castilla-La Mancha, a partir de los datos del Departamentu d'Aduanes de l'Axencia Tributaria, y que'l Ministeriu d'Industria, Turismu y Comerciu espubliza cada mes. Pese a la xuba de les esportaciones nel primer cuatrimestre, los datos del mes d’abril reflexaron un descensu añal del 11,68 por cientu al rexistrar ventes por 232,4 millones d’euros. Esti descensu débese na so mayor parte a la fuerte cayida de les ventes de les semimanufactures non químiques, de manera especial los metales non ferrosos y, en menor midida, a les del fierro y l'aceru.
 
L’informe tamién recueye les importaciones, que tuvieron un volume de 1.306,5 millones d’euros, polo que la medra ye del 23,8 por cientu. No que respeuta al mes d’abril, nesti casu sí hubo una xuba: un 31,35 por cientu, algamando los 369,9 millones.