Les escueles de Xixón celebren la so "Selmana de les lletres"

A lo llargo de los próximos díes, y coincidiendo cola celebración de la Selmana de les Lletres Asturianes, celébrase en Xixón la XI edición de les Xornaes de Llingua y Cultura Asturiana, qu'entamen güei vienres y que d'equí al 5 de mayu van presentar más d'una docena d'actividaes nes que van participar cerca de 4.000 escolinos de les escueles del conceyu y que van tener l'Atenéu de la Calzada como escenariu de les más de les actividaes.

Na inauguración, que se celebra güei a les once nel centru municipal d'El Natahoyo, va facese la entrega de los premios del concursu de poemes, cuentos ilustraos y carteles que faen alcordanza de la escritora María Teresa González y a los que se presentaron cientos d'escolinos ente toles categoríes. Un conciertu del grupu Xentiquina, talleres de cocina asturiana y vestimenta tradicional, una obra de teatru n'asturianu y una marcha pel camín del ferrocarril de La Camocha formen parte del programa nel que participen les escueles Atalía, Xove, Martínez Torner, Tremañes, Cervantes, Lloréu, García Lorca, Montiana, Santa Olaya y Príncipe d'Asturies.