Les entraes pa la gala del XV Premiu Camaretá al Meyor Cantar na Llaboral tán disponibles pa retirar

Cuatro artistes y bandes van defender la so propuesta na final qu'acueye'l xixonés Teatru de la Llaboral, onde va actuar tamién Algaire.

Hai seis modalidaes pa retirar les entraes, de baldre, pa la gala del XV Premiu Camaretá al Meyor Cantar que va tener llugar el domingu a les 19 hores. La más cómoda ye al traviés de la web de la Llaboral, anque tamién se pue facer n'unientradas.com o nel teléfonu 952.07.62.62 y, presencialmente, na puerta del espectacular recintu de Cabueñes, nel Centru d'Información Turística del Principáu d'Asturies (CITPA) n'Uviéu o nel Centru Niemeyer n'Avilés.

Los finalistes d'esta edición son Marisa Valle Roso, qu’acude con ‘Tonada'; Alienda, que presenta ‘Zanca de cabra’; el gaiteru José Manuel Tejedor, con ‘Les tos nales’; y Vero Rubio, que va defender ‘Dixo miou padre’. Amás, mientres el xuráu decide al ganador, va dar un conciertu breve Algaire, vencedor de la edición pasada con 'Coral y maera'.

Nun va haber televisión en direuto

TPA va emitir la gala del domingu, pero a diferencia d'años anteriores, va facelo en diferío. Va ser depués de 'El Tiempo', a les 21.45 hores.