Les dos xornaes de fuelga na minería llevaron al sector al paru total

La fuelga que tuvo llugar esti miércoles y xueves na minería del carbón provocó un paru total nel sector. Los mineros volverán a dexar los sos puestos de trabayu en mou de protesta la selmana próxima, los díes 30 y 31.
 
Les dos xornaes de protesta tuvieron una repercusión amplia, yá que tanto’l miércoles como’l xueves los mineros entamaron barricaes en cuatro puntos del país que provocaron atascos importantes, dalgunos d’hores de duración. Los puntos escoyíos polos trabayadores p’amosar el so descontentu ante los recortes al sector previstos pol Gobiernu estatal que lleven al desaniciu de la minería del carbón y a la muerte llenta de les zones mineres foron la ‘Y’, a l’altura d’El Monticu; l’A-66, en Ḷḷena; la AS-242, en Viḷḷallana (Ḷḷena); y la rotonda de la N-634 en Muros.
 
Les protestes van continuar el miércoles y el xueves próximos, a lo que se suma una xornada de fuelga xeneral nes zones mineres pa esti últimu día. Amás, na tarde del xueves, ta prevista una manifestación a nivel estatal en Madrid, con salida nel Santiago Bernabéu y final ante la sede del Ministeriu d’Industria.