Les cueves de Lluera van tar abiertes pa la so visita hasta'l 26 de setiembre

|
Cueva de Lluera

Tán asitiaes en Sograndio y cuenten con delles muestres d'arte del Paleolíticu.

Dende ayeri y hasta'l 26 de setiembre ye posible visitar les cueves de Lluera n'horariu de 10 a 16 hores, de miércoles a domingu. Guíes dependientes de la Direición Xeneral de Patrimoniu Cultural van encargase de xestionar les reserves y dirixir les rutes pel xacimientu con entrada per Priorio, un enclave caracterizáu por unes condiciones d’accesu complicaes y males d’atopar, pa lo qu'hai qu'acutar plaza al traviés del númberu de teléfonu 674.80.03.85, n’horariu de 15 a 17 hores.

El conxuntu de grabaos esteriores de Lluera ye’l más importante de los conocíos nel valle mediu del Nalón y ta consideráu de primer nivel nel conxuntu del arte rupestre paleolíticu cantábricu. El xacimientu destaca pola so cantidá tan grande de grabaos, la so calidá y la téunica con que se fixeron.

Dos cueves

Lluera tien un antepar que s’abre en dos galeríes. La de la izquierda contién un gran númberu de grabaos en dambes paredes, mientres que la de la derecha ye la zona de más espesura del xacimientu, anque nun se toparon grabaos nella.

Unos 50 metros ríu arriba atópase un pasadizu natural hacia l’interior de la cueva, lo que güei se conoz como Lluera II, onde tamién s’alcuentren muestres importantes d’arte rupestre compuestes por grabaos.

Na imaxe, la cueva principal. Semeya obra de Nachosan baxo llicencia CC BY-SA 3.0.

 

Contador Estadistiques