El BOE d’esti martes espublizó’l Real Decretu-llei de reformes pa garantizar la sostenibilidá del Sistema Nacional de Salud aprobáu’l vienres. Les autonomíes van tener hasta’l 30 de xunu p’adaptasae al copagu farmacéuticu.
Según la norma nueva, "l'aportación del usuariu va ser proporcional al nivel de renta, que va actualizase, a lo más, añalmente". D'esta manera, los activos con una renta igual o superior a 100.000 euros tendrán que facese cargu d'un 60 por cientu del preciu de les melecines, baxando al 50 por cientu si la renta ta ente los 18.000 y los 100.000 euros, y al 40 por cientu pa les persones que tengan renta inferior a los 18.000 euros. Amás, los usuarios de prótesis, productos dietéticos y del tresporte sanitariu non urxente tamién tendrán que pagar parte del importe d'estos servicios.
L'oxetivu de la reforma sanitaria ye llograr un aforru estimáu de 7.000 millones d'euros, de los que casi la metá, unos 3.550 millones, va llograse con estes midíes, a les qu’hai que sumar la desfinanciación pública de fármacos "obsoletos" o "con menor terapéuticu"; un plan pal impulsu de melecines xenériques; nuevos precios de referencia; y l'axuste de los envases a la duración de los tratamientos. Coles mesmes, el Gobiernu estatal tamién preparó un plan pa lluchar contra'l turismu sanitariu y l'usu "fraudulentu" de la sanidá por parte d'estranxeros non residentes n'Estáu, col que van aforrase unos 1.500 millones d'euros.
La reforma tamién establez la creación d'una Plataforma de Compres Centralizada pa que les autonomíes merquen de forma conxunta melecines hospitalaries y teunoloxía médica, como yá se fai cola vacuna del gripe, cola que va xenerase un aforru d'ente 1.000 y 1.500 millones d'euros. El restu va venir de la creación d'una cartera de servicios común pa toles comunidaes y la implantación de la 'e-salú' (700 millones d'euros); meyorando la coordinación ente los servicios sanitarios y los servicios sociales (600 millones d'euros); y cola ellaboración d'un catálogu homoxeneu de categoríes profesionales que facilite la movilidá ente los servicios de salú (500 millones d'euros).
Adxuntu | Tamañu |
---|---|
![]() | 556.82 KB |