Les celebraciones pol Día d'Asturies, en Corvera

El conceyu yá foi sede d'esti festexu nel 1987.

Corvera va acoyer les celebraciones del Día d'Asturies, tomando asina'l relevu de Cabrales, últimu llugar escoyíu pol Gobiernu nel 2019. Nin nel 2020 nin nel 2021 hebo actividaes pol 8 setiembre por cuenta de la pandemia de COVID-19.

La fiesta va principiar el xueves, día 8, y va allargase tola fin de selmana coincidiendo cola festividá del conceyu, el vienres. Mercaos, competiciones deportives, recitales y animaciones pa tolos públicos pol Día d'Asturies van coincidir nesta ocasión cola programación llocal.

La última vegada que Corvera acoyó les celebraciones oficiales del Día de la Nación Asturiana foi va 35 años, nel 1987. Un concierto del cantante italianu Franco Battiato, que nos dexó l'añu pasáu, foi l'atraición principal.

Na semeya, puestos del mercáu instaláu n'Arenas pol Día d'Asturies del 2019.