Les campañes del Gobiernu pal pequeñu comerciu y del consumu de sidra de la DOP escaecen l’asturianu

“La llingua propia ye l'elementu meyor pa mostrar cercanía y apegu a lo propio”, recuerda la Xunta pola Defensa de la Llingua Asturiana (XDLA), que llamenta l’ausencia del idioma nes campañes entames pal consumu de sidra y nel pequeñu comerciu. “El Gobiernu asturianu mantién en cuarentena a la llingua asturiana”, afirma.

El Conseyu Regulador de la Denominación d'Orixe Protexida (DOP) Sidra d’Asturies lleva dellos díes moviendo una campaña en redes sociales p’adaptar el consumu de sidra a la ‘normalidá nueva’. Ésta consiste na distribución de vasos con tipografía de colores diferentes cola intención de que los veceros puedan distinguir por cuál tán bebiendo y evitar asina contaxos.

En total son 40.000 vasos, toos en castellanu. “Ye esmolecedor que la DOP dexe siempre de llau'l nuestru idioma, cuando precisamente'l vocabulariu tradicional de la sidra ye n'asturianu”, apunta’l coleutivu cívicu, que recuerda que “la llingua propia ye la manera meyor de marcar la diferencia y la calidá dientro d'un contestu global”.

Na campaña entamada pol Gobiernu pa promover el consumu nel pequeñu comerciu llocal asocede más de lo mesmo. “Ye una estratexa enquivocada defender lo llocal, lo de casa, ensin tener presente la realidá llingüística que-y val de vehículu pa espresase. Nun tien sentíu que la llingua asturiana nun tenga un papel protagonista nesta campaña”, denuncia la XDLA.

“Ye la hora de los fechos”

La organización amuesa la so sorpresa por “cómo'l Gobiernu asturianu mantién en cuarentena a la llingua asturiana” y asegura que “depués d'un añu de les elecciones autonómiques, vemos que poco cambió”. Fala de “palabres guapes y xuegos florales en redes sociales”, lo que considera insuficiente “pa salvar un idioma en peligru de desapaición”.

“Ye la hora de los fechos: la llingua asturiana tien que formar parte del procesu de reconstrucción social y económicu que se ponga en marcha y estes campañes dexen ver que’l Gobiernu d’Adrián Barbón nun tien esa intención”, afirma.