Les beques Severo Ochoa d'ayudes predoctorales van tener una dotación de 4,4 millones d'euros

El Gobiernu va destinar 4.439.208 euros al programa Severo Ochoa d'ayudes predoctorales. Estes beques van dexar que 55 titulaos, 10 más que na convocatoria última, del 2014, empecipien la so formación investigadora y realicen una tesis doctoral.

Mientres el períodu máximu de les ayudes, que ye de cuatro años, les persones beneficiaries van recibir sofitu económicu y van ser contrataes por un centru de adscripción nel que van desenvolver la so formación investigadora: la Universidá d'Uviéu, los centros del Conseyu Superior d'Investigaciones Científiques n'Asturies (CSIC) y el Serviciu de Salú del Principáu d'Asturies (Sespa), ente otros. Por ello, esti programa va suponer tamién una fonte d'emplegu pa los mozos investigadores, que se van empecipiar na docencia a partir del segundu añu.

Los contratos predoctorales sumen una cuantía anual d’aproximao 1.107.000 euros, qu’implica al empar una ayuda mensual de casi 1.677 euros brutos. El total resultante nos cuatro años de vixencia del programa supera los 4,4 millones.

Cinco grandes árees de conocencia

Les 55 ayudes previstes repártese ente cinco grandes arees de conocencia: Artes y Humanidaes, Ciencies, Ciencies de la Salú, Ciencies Sociales y Xurídiques y Inxeniería y Arquitectura. El programa, tal como precisa'l Plan Estratéxicu de Subvenciones de la Conseyería d'Educación y Cultura, tien como finalidá la formación n'investigación y docencia d'estudiantes de posgráu por aciu la realización d'una tesis doctoral en departamentos o institutos universitarios, n'organismos públicos d'investigación o en centros teunolóxicos allugaos na comunidá autónoma.

El mesmu ta dirixíu a quien superaren los requisitos p'acceder a les enseñances de tercer ciclu o a los estudios oficiales de posgráu, conforme a lo que se determine nes correspondientes convocatories. Amás, los solicitantes tendrán que tener formalizada la matrícula nun programa de doctoráu de la Universidá d'Uviéu nes circunstancies que se marquen nes convocatories correspondientes, y cuntar con un espediente académicu completu con una nota media igual o superior a la que se requier.

La convocatoria del programa Severo Ochoa correspondiente al exerciciu del 2014 cuntó con un presupuestu de 3.540.852,44 euros.