Les bases d'EQUO apoyen un alcuerdu eleutoral nuevu con Podemos

Tamién el caltenimientu de los resultaos de les primaries del 20-A de cara al 26-X.

Del 29 d'abril hasta ayeri pudieron votar los afiliaos d'EQUO éstes y otres cuestiones de cara a la convocatoria nueva d'eleiciones pal 26 de xunu, que nun taben confirmaes entovía pero que yeren yá casi un fechu. Asina, a la entruga sobre si deben celebrase primaries nueves pa esta convocatoria, el 81 por cientu apostó por dar por bonu'l resultado de les que se fixeron pal 20-A, por un 16 por cientu que quería otres nueves. Mentes, un 3 por cientu astúvose.

Respeuto al programa, el 93 por cientu de les persones afiliaes y simpatizantes votó a favor de caltener el de les eleiciones pasaes, mientres que'l 4 por cientu preferiría ellaborar ún nuevu y el 3 por cientu, astúvose. Otra manera, EQUO tamién consultó'l sobre la posibilidá de repetir l'alcuerdu eleutoral con Podemos nel que miembros del partíu verde acudieron nes llistes de la formación morada como independientes, algamando escañu Rosa Martínez, por Bizkaia; Juantxo López de Uralde, por Araba; y Jorge Luis Bail, por Uesca en representación del espaciu de confluencia Alto Aragón en Común.

Nesti puntu, un 85 por cientu votó que la Comisión Executiva Federal d'EQUO retome les conversaciones con Podemos pa definir la participación d'EQUO nel alcuerdu de coalición eleutoral nel que se ta trabayando con otres fuercies polítiques, por un 12 por cientu que votó en contra y un 3 que s'astuvo. Sicasí, l'alcuerdu resultante d'esti procesu va ser sometíu a una consulta nueva a les bases.

Alternativa a les polítiques neolliberales, los recortes y continuismu del modelu

"Dende EQUO reiteramos l'apuesta por una confluencia amplia que sía representativa de la mayoría social y la diversidá política de los que planteguen una alternativa a les polítiques neolliberales, los recortes sociales y el continuismu d'un modelu económicu, políticu y social qu'avanza dando'l llombu al bien común. La opción de la coalición supón un modelu de cooperación qu'integra a los diferentes partidos, pero que respeta les distintes sensibilidaes, y la posibilidá de compartir un proyeutu de cambiu p'ameyorar la vida de les persones, defender los sos derechos y promover un modelu sostenible. Les propuestes verdes van xugar un papel relevante nos retos de la llexislatura próxima y la voluntá d'EQUO ye contribuyir de forma actiiva nesta confluencia plural que les fuercies del cambiu tán construyendo", afirmen los ecoloxistes.