Les bandes participantes nel FIDO lleguen per mar a Tapia

Esti xueves va celebrase una actividá nueva dientro del Festival Intercélticu d’Occidente (FIDO). Trátase de la ‘Arribada del mundu celta’, na que los grupos participantes nel certame van aportar a Tapia per mar nun actu que promete ser espectacular.
 
La llegada de les embarcaciones, cedíes polos marineros tapiegos, ta prevista pa les 20 hores. Va ser un espectáculu musical inéditu nel que van participar la Corisco y la Banda Atlántida de Matamá (Galicia), la Bagad Ker Vourdel (Breizh), la Gibraltar Sea Scouts Pipe Band (Gibraltar) y la Banda Gaites Villa de Mieres, esto ye, les cinco bandes que participen nel FIDO. La organización recomienda a los asistentes que se sitúen na zona d’A Guardia o nel puertu de Tapia pa poder presenciar bien esti actu d’acoyida oficial.
 
Amás, la tercer xornada del FIDO va tar marcada pola celebración del ‘Día del neno celta’, con un taller etnográficu nomáu ‘As nosas faenas’ que va principiar a les 17 hores nel parque de Tapia. Nél, los nenos y nenes van aprender a recoyer patates, pa lo que se solicita a los pas que lleven ropa vieyo y un calderu. Tres esta actividá, van poder disfrutar d’una merienda y un cuentacuentos.
 
Mentes, yá pela nueche, a partir de les 23.30 hores, va ser el turnu de la primer nueche del Murallón Folk. Les persones que s’averen a la sablera del Murallón van poder disfrutar de dos bones actuaciones cola presencia de la banda chilena de raigaños asturianos Ta Fechu y del tríu Sacava (Santos, Caleya y Varela). Enantes d’esti conciertu, a les 21.30 hores, pa calentar boca, va haber una ‘jam session’ con un conciertu n’acústicu de miembros d’El Koku la Manzana y Ayalga.
 
Otra manera, ayeri tuvo llugar la segunda y cabera xornada d’esta edición del Culturlingua, que consistió nun homenaxe a la banda de música llocal La Filarmónica. Esta fomación nació nel 1945 y tuvo activa hasta 1949, ofreciendo’l so conciertu caberu na fiesta de San Blas de 1949. El so direutor foi’l pontevedrés Braulio Pereira y tenía un total de venti integrantes, de los que trés d’ellos, José Fernández, José María Martínez y Antonio Pérez, participaron nuna charra-coloquiu nel Auditoriu. “Quiximos homenaxear a aquelles persones que quixeron mantener viva una ilusión con muncho sacrificiu y superando les dificultaes qu’atoparon pel camín”, esplicaron los organizadores, qu’instalaron una esposición con semeyes y oxetos de La Filarmónica y d’otres bandes llocales.
 
Apertura del Mercáu Tradicional Asturianu en Xixón
 
Xixón tamién ta viviendo estos díes el so certame dedicáu a la cultura celta, el Festival Internacional Xixón 5º 40’, que güei incorpora un Mercáu Tradicional Asturianu en Campu Valdés y delles cais de Cimavilla. Ésti va tar abiertu hasta’l domingu n’horariu de 12 a 20 hores. Amás, pa esta tarde ta prevista l’actuación del humorista Carlos Alba ‘Cellero’, que va representar a les 19 hores na plaza de Casa Nava’l so monólogu ‘El mio güelu y yo’.
 
No que respeuta a lo musical, los xixoneses y visitantes van poder disfrutar güei del conciertu de los irlandeses Mairtin O'Connor Band na Plaza Mayor a partir de les 22 hores. Ésta va ser la primer ocasión na que va poder vese n'Asturies al renomáu acordionista.