Les ayudes a la creación lliteraria aumenten nel 2024 hasta los 48.000 euros

La Viceconseyería de Cultura, Política Llingüística y Deporte ta acabante de convocar les subvenciones pa la creación lliteraria del 2024, que pasa de los 40.000 euros anuncios nel 2023 a 48.000. Pueden acceder a esta ayuda, que recibió más d'un centenar de propuestes esti añu, autores n’asturianu, gallego-asturiano y castellanu.

Nel 2023 convocóse per primer vez esta llinia d’ayudes, resultando escoyíos seis proyeutos en caúna de les dos llinies coles que cuenta –profesionales y aficionaos– que recibieron 3.000 euros, polo que la cantidá total repartida foi de 36.000 euros. Premióse una por cada categoría: novela curtia o llibru de rellatos (un mínimu de 30.000 pallabres); poesía (un mínimu de 500 versos), teatru (mínimu de 20.000 pallabres); cómic o novela gráfica (mínimu de 40 páxines); ensayu sobre un tema propiu del campu de les humanidaes (un mínimu de 30.000 pallabres); y lliteratura xuvenil (un mínimu de 20.000 pallabres).

Nesta ocasión tán presupuestaos 48.000 euros, calteniéndose’l tope de 3.000 euros pa cada proyeutu. El plazu pa presentar la memoria esplicativa de la propuesta, un máximu d’ún por persona en cada categoría, fina’l 26 de xineru.

El xuráu encargáu de valorar tolos trabayos va tener en cuenta la calidá artística y téunica del proyeutu (hasta 30 puntos) y la so orixinalidá (hasta 20 puntos), según les especificaciones concretes que marquen les bases. Los trabayos qu’algamen l’ayuda han tar terminaos y xustificaos pal 30 de setiembre.