Les Asamblees de Trabayadores en Llucha convoquen delles movilizaciones n'Uviéu

Coincidiendo colos actos de los Premios Princesa de Asturias na ciudá.

Éstos van concentrase mañana y el vienres, día d'entrega de los gallardones, y van centrase nos "despidos, los ERES, los zarros d'empreses, los recortes salariales, les privatizaciones, la precarización del emplegu y la represión contra les protestes sociales y llaborales". "Les Asamblees de Trabayadores en Llucha refugamos que, al amparu del merecíu prestixu de los gallardonaos, preténdase una vegada más utilizar a Asturies como un decoráu de cartón piedra pa que los responsables de la crisis que tamos pagando los trabayadores, los implicaos na corrupción política como corruptos o como corruptores, los personaxes que figuren nos papeles de Panamá, los grandes empresarios que se tán arriqueciendo entovía más cola corrupta y xenocida Reforma Llaboral, los privatizadores de servicios públicos y otros personaxes del mesmo estilu, deanse un bañu d'honorabilidá y moralidá que nun se merecen", afirmen al tiempu que conviden a la ciudadanía a participar nestes movilizaciones.

La primera va celebrase a les 11 hores de mañana frente al Hotel Reconquista, onde s'agospien los premiaos que yá tán n'Uviéu, pa protestar "polos despidos y les represalies contra los trabayadores" del establecimientu, amás de p'apoyar a Raquel Agüeros, "presidenta del Comité de Empresa del hotel, represaliada por defender los derechos de los sos compañeros". Darréu, va entamase un pasucais hasta la Xunta Xeneral pa celebrar un concentración dende les 12.30 a les 13.30 hores.

Yá de tarde, a les 18.30 hores, va celebrase una concentración nueva, nesta ocasión énte l'Auditoriu d'Uviéu, onde va tener llugar el XXV Concierto Premios Princesa de Asturias, nel que collabora la Fundación CaxAstur Liberbank y nel que ta anunciada l'asistencia de los reis d'España, pa denunciar los ERES na entidá bancaria "y contra la privatización de CaxAstur".

Por último, el vienres, a les 17 hores, l'Asamblea de Trabayadores en Llucha convoca una protesta "contra la Reforma Llaboral, la Llei Mordaza y la corrupción" na plaza la Escandalera coincidiendo cola llegada de los reis, los gallardonaos colos Premios Princesa de Asturias, les autoridaes y los convidaos al Teatru Campoamor pa la gala d'entrega de les distinciones.