"Les aliances del PSOE col Partido Popular queden cuestionaes", afirma Llamazares

El voceru d'IX na Xunta Xeneral fixo estes declaraciones tres felicitar a Pedro Sánchez pol so trunfu nes primaries socialistes.

"La participación de la militancia vino pa quedase y hai vegaes que ye contradictoria colo que podemos llamar los aparatos de los partíos: habrá que conciliar la participación direuta de la militancia y la direición política de les organizaciones", comenzó Gaspar Llamazarez en referencia a la victoria de Sánchez, qu'añadió que "cuanto más tardemos en facelo, más crisis y más situaciones complexes tendremos". Asina, siguió afirmando que'l rellatu del desbloquéu pa la formación de Gobiernu que defendió la xestora del PSOE, "quedó estrozáu nel camín; foi cuestionáu pola militancia socialista y creo que ye cuestionáu pol conxuntu de la izquierda. Nun desbloquiamos nada; caltenimos el bloquéu y la degradación de les instituciones democrátiques".

"Les aliances del Partido Socialista col Partido Popular queden tamién cuestionaes, y la Federación Socialista Asturiana debería faceselo mirar y debería ver cómo recompón una mayoría d'izquierdes nesta comunidá autónoma, si nun ye posible una mayoría de Gobiernu; una mayoría puntual que nos permita recuperar una mayoría presupuestaria. Ehí ye ónde ta'l retu y son les conclusiones que nos valen a los partíos asturianos", aseguró Llamazares.