Les Ablanes entama un ciclu de cine al aire llibre

L'asociación cultural piloñesa va estrenar esta iniciativa en La Cueva con 'Carne de gallina'.

Esti branu Piloña va contar con un ciclu de cine al aire llibre. Les Ablanes, en collaboración col Conceyu, entama la proyeición de cuatro películes na área recreativa, cola Sala Polivalente de L'Infiestu como alternativa d'haber mal tiempu.

Nun va ser el casu de güei, cuando s'espera un cielu nubláu ensin agua y una temperatura de 16 graos pa la hora prevista, les 22 hores. Les persones presentes van poder ver 'Carne de gallina', una comedia dramática de Javier Maqua rodada n'Asturies nel que los actores, la mayor parte de fuera, empleguen un asturianu amestáu col castellanu.

Nes cites siguientes van proyeutase 'Los Goonies', el miércoles 28; 'Cenizas del cielo', el 11 d'agostu; y 'V de vendetta', el 25 d'agostu. Les Ablanes, coleutivu de calter cultural nacíu nel 2019 que tien como oxetivu incidir na actividá cultural y festiva de Piloña, y que recuerda que ye obligatorio acudir con mázcaru y cumplir con toles midíes de seguranza afitaes pola COVID-19, va instalar un puestu de comida, bébora y productos de l'asociación nel llugar.