Les 51.000 firmes recoyíes contra los eventos taurinos lleguen a la Xunta Xeneral en forma de PNL

|
Nuria Rodríguez López, Víctor Manuel Iglesias y Ovidio Zapico PNL toros

Podemos y Izquierda Xunida (IX) rexistraron esti martes na Xunta Xeneral una Proposición Non de Llei contra la celebración d’espectáculos taurinos n’Asturies. Esta inicitativa naz de la campaña entamada por Víctor Manuel Iglesias y roblada por Huellas del Sella a partir de la corrida de Benia que recoyó más de 51.000 firmes.

Nuria Rodríguez López y Ovidio Zapico acompañaron esta mañana al promotor de la campaña ‘No a la corrida de toros en Onís. Asturies libre de maltrato animal para siempre’ entamada na plataforma dixital Change.org nuna intervención pública pa presentar la PNL, que cuenta con dos puntos. El primeru marca que “la Xunta Xeneral del Principáu d’Asturias espresa la so posición contraria a los espectáculos taurinos en xeneral y al so mantenimientu na nuesa comunidá autónoma en particular al considerar que son una espresión cruel de maltratu animal que nun pue xustificase polos sos discutibles valores artísticos y culturales”.

Mentes, el segundu encamienta “al Conseyu de Gobiernu a dirixise al ‘Gobierno de la Nación’ a fin de qu’impulse la derogación de la Llei 18/2013, de 12 de payares, pa la regulación de la Tauromaquia como patrimoniu cultural, pa permitir que la nuesa comunidá Autónoma pueda llexislar la prohibición de los espectáculos taurinos en tol territoriu de la comunidá autónoma”. “Queremos que sía Asturies la que tenga competencia pa decidir que se puedan celebrar equí o non esos espectáculos taurinos”, espresó’l coordinador xeneral d’IX, qu’apuntó que “nun podemos tar cada branu con esta polémica” sobre “una fiesta, lo de fiesta ente comines, que, felizmente, yá se superó nes grandes ciudaes d’Asturies".

“Los asturianos celebramos la vida”

Iglesias agradeció a los 51.511 firmantes que participaron na campaña y a les dos formaciones por llevar esta demanda a la Xunta Xeneral al traviés d’una PNL. “Los asturianos cuando celebramos fiestes celebramos la vida, nun celebramos la muerte nin celebramos la tortura animal pa divertinos. Los animales n’Asturies, les nueses races autóctones, tán representaes dende va sieglos nel nuesu mundu: respétense, cuídense, criénse n’estensivu n’harmonía y conexón cola naturaleza y col nuesu entornu rural”, aseguró’l promotor de la campaña.

“Estos actos de tortura animal lo único que dexen n’Asturies ye refugu y malestar, porque cuando xente ayeno al nuesu territoriu se cita en Benia pa matar unos toros que son criaos fuera d’Asturies, que son esbillaos por unos señores ganaderos qu’en nada representen al nuestru entornu rural, y que cuando conclúi l’eventu marchen, dexen na nuesa comunidá un restu d’incomodidá ente los vecinos y mieu a la hora de manifestase públicamente. Nun nos representen, nun ye cultura y nun ye la cultura de los asturianos”, espresó.

La diputada de Podemos siguió’l mesmu discurso recordando que les celebraciones asturianes nada tienen que ver con espectáculos taurinos y punxo les fiestes de l’ablana en L’Infiestu, la de la fresa en Candamu o la de les cebolles rellenes en L’Entregu como exemplu de “cómo n’Asturies nos rellacionamos col mediu natural y festexamos”. Y al respeuto, quixo dar un datu: “La mayor ocupación turística de la historia de Xixón diose xusto esti añu que nun hebo festexos taurinos”.

Por contra, fixo referencia a les declaraciones feches por hoteleros y hosteleros d’Onís, “que dixeron públicamente que se fixeron cancelaciones pola celebración del eventu taurín en Benia”. “Traen un clima de tensión y conflictividá social”, aseguró Rodríguez López, qu’apuntó que la mayor parte de los 1.800 aficionaos a los toros presentes na corrida del 20 d’agostu, confirmaos polos organizadores sobre un aforu de 3.000 reducíu a unos 2.700 por seguranza, “veníen de fuera” magar contar inclusive “con una llamamientu de VOX p’acudir” a la plaza portátil.

Na semeya, Rodríguez López, Iglesias y Zapico.

Contador Estadistiques