Leo Bassi va llevar a Uviéu el so espectáculu ‘Utopía’ dientro d’unes xornaes sobre la crisis

El Conseyu de la Mocedá d’Asturies (CMPA) organiza unes xornaes n’Uviéu col títulu ‘Crisis. What crisis!’ pal 9 d’abril nel Auditoriu Príncipe Felipe d’Uviéu. El día 6, como actividá complementaria, entamen una actuación de Leo Bassi.
 
L’actor y cómicu italianu va representar a les 20.30 hores nel Teatru Filarmónica d’Uviéu ‘Utopía’, una obra que trata sobre la crisis actual nel que Bassi fai una crítica a la izquierda por “nun aprovechar la derrota del pensamientu y la filosofía neoconservadora” y por mostrar “un vacíu ablucante de propuestes, dexando pasar esta ocasión ensin proponer nenguna alternativa y confirmando la necesidá d’alcontrar sueños nuevos con una enerxía nueva”, comenta’l propiu autor na so web. Bassi señala que la tesís central de ‘Utopía’ ye que “hai que tornar a la fonte del pensamientu d’izquierdes, rexuvenecer los nuesos valores o, sinón, cuaquier día descubriremos que hasta los principios de la Illustración serán puesto en dulda pol Oscurantismu Nuevu”. Un espectáculu 100 por cientu Bassi que va poder disfrutase a un preciu anticrisis de namái 5 euros.
 
El sábadu 9, mentes, va tener llugar el restu de les xornaes, nes que tamién participen la Coordinadora de ONGD's d’Asturies y l’Axencia Asturiana de Cooperación al Desarrollu. L’actividá va principiar a les 10 hores cola presentación de les xornaes a cargu de Marcos Cienfuegos, direutor de l’Axencia; Marcelino Sánchez, presidente del CMPA; y Mercedes González, presidenta de la Coordinadora. A les 10. 30 hores, Joaquín Arriola, profesor d’Economía Política de la Euskal Herriko Unibertsitateko, va ufrir la charra ‘Crisis de engorde, cura de adelgazamiento’, mentes que al meudía, el turnu ye pal politólogu presidente d’ATTAC nel Estáu, Carlos Martínez, con ‘Los nuevos dictadores: mercados y banqueros’.
 
Pa les 13 hores ta prevista la participación de José Manuel Paredes Castañón, catedráticu de Derechu Penal de la Universidá d’Uviéu, que va falar de ‘La crisis legal: del garantismo al populismo’. Yá de tarde, a les 17 hores, Daniel Reventós, profesor titular de la Facultat d’Economía i Empresa de la Universitat de Barcelona, va presentar la charra ‘Verdades y mentiras sobre la crisis económica. Cómo afecta a la juventud y algunas alternativas en la era de la codicia’, y pa zarrar les xornaes, a les 18 hores, van esponese dos esperiencies de trabayu ciudadanu: Jesús Barcelona, del Sindicato de Técnicos del Ministerio de Hacienda-GESTHA, va esplicar 'Cómo hacer que los ricos/as paguen la crisis', y Pablo Iglesias Turrión, profesor de Ciencia Política na Universidad Complutense de Madrid va falar de 'La tuerka. Crisis y medios de Comunicación alternativos'. Toles persones qu’acrediten una presencia del 80 por cientu na xornada, que ye de baldre, van poder solicitar un certificáu d’asistencia.