Ledo sustitúi a Sariego como direutor xeneral de Personal Docente

Un Conseyu de Gobiernu estraordinariu celebráu esti llunes nomó a l’avilesina Eva Ledo como direutora xeneral de Personal Docente, cargu que yá ocupó la llexislatura pasada. Sustitúi nel cargu a Miguel Sariego, que dimitió la selmana pasada polos errores nes oposiciones al cuerpu de maestros qu'afeutaron a 11 aspirantes.

Nacida nel 1966 y inxeniera industrial especializada en Lletricidá, Ledo yera dende’l 18 de marzu presidenta del Conseyu d’Asturies de la Formación Profesional. Nun-y resulta nuevu’l cargu, yá que na pasada llexislatura ya lu ocupó; previamente fora xefa del Serviciu de Formación Profesional y Enseñances Profesionales.

Dende’l 1995 ye funcionaria de carrera del cuerpu de Profesores de Enseñanza Secundaria nes especialidaes de Teunoloxía y Sistemes Electrónicos y Automatismos, y forma parte del cuerpu d’Inspeutores d’Educación dende’l 2014. Tamién trabayó nos ámbitos de la siderurxa, la informática y la inxeniería de proyeutos.

Releva nel cargu a Sariego, que dio’l pasu de dimitir depués de los errores nel procedimientu seleutivu al cuerpo de maestros, xestionáu por un comité dependiente del so departamentu. Once opositores foron declaraos aptos per unes hores nos llistaos oficiales, modificaos depués por aplicase un baremu derogáu pal cálculu de los puntos, lo que dexó a estos aspirantes ensin plaza.

Nos díes próximos, el Gobiernu va anunciar al sustitutu de Ledo na presidencia del Conseyu d’Asturies de la Formación Profesional.