L'editorial del Anuariu de la Música Asturiana 2016 céntrase nel papel qu'ha de xugar la RPA

La espublización demanda un tratamientu "tresversal" a la música del país na programación de la radio pública. El númberu nuevu preséntase nel Llar La Llegra.

"La música propia del país ha tener un tratamientu fondu, seriu, permanente y tresversal na so programación", afirma la editorial del Anuariu de la Música Asturiana 2016, que lleva'l nome de 'Una radio musicalmente asturiana'. Nél la revista qu'espubliza Goxe Producciones y que fai repás a l'actividá musical del país analiza fondamente qué papel ha de xugar la RPA na difusión de la música tradicional y la fecha nes llingües del país, con una presencia anguaño cásique nula.

La portada d'esti añu protagonízala l'artista revelación, Rodrigo Cuevas, qu'echa una mirada al 2016, cuando se convirtió nun fenómeno de mases. Otros artículos destacaos son los reportaxes entitulaos '¿La tercer revolución del folk asturianu?', sobre les tendencies y estilos nuevos que tán surdiendo nel panorama folk del país; 'Política musical asturiana: análisis, revisión y propuestes', onde protagonistes destacaos de la escena asturiana falen de too ello; o 'Música na maleta', que trata sobre'l llabor de los músicos asturianos emigraos.

Tamién hai espaciu pa informes, como 'La segunda xeneración moza', que se centra nes voces más nueves de la tonada, y pa entrevistes. Nesta ocasión, amás de la que protagoniza Cuevas, inclúinse otres a Vicente Díaz, a Marisa Valle Roso y al gaiteru Bras Rodrigo.

Completen los conteníos del Anuariu les cróniques sobre'l Premiu al Meyor Cantar y sobre la participación asturiana nel Desfile de San Patriciu de Nueva York, y la seición 'Collecha', onde apaecen les producciones del añu 2016, ventiséis en total, centraes fundamentalmente na tonada y la música pa neños. Esta cantidá ta "mui per debaxo de les d’hai unos años", según comenten dende Goxe Producciones.

D'igual forma, hai que destacar los collaboradores d'esti númberu nuevu, coles firmes d'Ismael Arias, Ruma Barbero, Alberto Álvarez Peña, Inaciu Llope y Adolfo Camilo Díaz.

Discu con 17 cortes

Como tolos años, l'Anuariu de la Música Asturiana, que torna a ser de baldre, inclúi un CD con composiciones de tolos estilos, dende la tonada, el folk o'l rock, a les bandes de gaites o la canción d’autor. En total son diecisiete cortes que conformen una amuesa de la producción musical asturiana del 2016 y que protagonicen L'Aldu, Señor Cabrales, Salón Bombé, Taranus, Rodrigo Cuevas, Pop Piquiñín, LaKadarma, Amieva o L-R.

La presentación de la revista va celebrase mañana, a les 19.30 hores, nel uviedin Llar La Llegra. Nella van participar los sos responsables, Xune Elipe, Damián Barreiro y Xicu Ariza, que van protagonizar un alderique sobre la situación de la música asturiana. D'igual forma van distribuyise los primeros exemplares del anuariu y va entamase un mercadín de discos nel que miembros de grupos o discográfiques pueden vender la so producción.