L'ecoloxismu, roceanu col Cavaliere

El mundu ecoloxista anda revueltu pola presencia de Silvio Berlusconi na presidencia de la UE. Al dicir de les organizaciones verdes del estáu tresalpín, lo más fácil ye que'l Cavaliere acabe esportando la malísima política ambiental que fai n'Italia, y por eso ente delles organizaciones presentaron güei l'nforme "Un modelu de desregulación ambiental esportáu a Europa?" en que se fai un resume de l'actividá a la escontra del mediu ambiente del mandatariu italianu. Anque dende'l cargu que tien na UE tampoco nun va tener un poder decisivu en munches coses, el cumplimientu del Protocolu de Kyoto, la normativa sobre tresxénicos o la directiva nueva de sustancies químiques (REACH) sí que dependen de les polítiques que mande Berlusconi. Ente los firmantes del documentu, que se-yos mandó a tolos grupos parllamentarios de la eurocámara, tan Greenpeace, Birldlife, FAI-Fondo per l'Ambiente Italiano, Legambiente, LIPU, Italia Nostra y hasta l'Istituto Nazionale di Urbanistica, que ta cansu de les polítiques d'infraestructures descomanaes qu'entama Berlusconi n'Italia.