L'Ayuntamientu de Xixón desanicia l'asturianu

Dende va yá seyes años, l'Ayuntamientu de Xixón edita y reparte de baldre per tola ciudá la revista "Gaceta de Gijón". Esti cartafueyu suel enxertar siempres un par d'artículos n'asturianu nes sos páxines, les más de les veces llendaos a temátiques del Xixón rural, que s'asocien tradicionalmente col conceptu del asturianu como adornu folklóricu y emblema de lo vieyo o, nos casos más rupturistes, a informaciones emitíes dende'l Conseyu de la Mocedá, entidá defensora del asturianu gracies al trabayu de les organizaciones asturianistes enxertaes nelli. De va unos meses p'acá, esa presencia, yá de por sí testimonial y llendada siempre a unos pocos temes, ta cásique desapaeciendo de les páxines del conceyu, neto na edición en papel de La Gaceta que na páxina web municipal, que, dende qu'estrenó la nueva versión remocicada, prácticamente nun inclúi referencia nenguna n'asturianu, como yá anunciáremos n'Asturies.com. Esti desaniciu del asturianu nos medios de comunicación oficiales del Ayuntamientu de Xixón denunciolu ayeri Izquierda Asturiana nun comunicáu nel que, arriendes d'esponer estos datos, el partíu políticu apunta a la persona del conceyal José María Pérez como responsable directu d'esta situación. Pa IAS la cosa ye más grave de lo que parez, porque amás el conceyal pertenez a les Xuventúes Socialistes, que nel últimu congresu que tovieron aprobaron resoluciones al favor de la oficialidá y que vienen declarándose favorables a la normalización idiomática.